ກະຊວງພາຍໃນ

Ministry of Home Affairs

ກອງປະຊຸມຄົບຄະນະບໍລິຫານງານສະຫະພັນແມ່ຍິງກະຊວງພາຍໃນ ປະຈໍາປີ 2020

ວັນທີ 10 ກຸມພາ 2021 ສະຫະພັນແມ່ຍິງກະຊວງພາຍໃນ ໄດ້ຈັດກອງປະຊຸມຄົບຄະນະບໍລິຫານງານສະຫະພັນແມ່ຍິງກະຊວງພາຍໃນ ຄັ້ງທີ 1 ສະໄໝທີ II ປະຈໍາປີ 2020 ຂຶ້ນໂດຍການເປັນປະທານຂອງທ່ານນາງ ຄໍາພູນ ແກ້ວສະຫວັນ ປະທານສະຫະພັນແມ່ຍິງກະຊວງພາຍໃນ, ມີຮອງປະທານຄະນະບໍລິຫານງານ, ຄະນະໜ່ວຍແມ່ຍິງ, ກອງເລຂາ, ຄະນະຮັບຜິດຊອບກອງທືນ ແລະ ຄະນະຮັບຜິດຊອບວຽກງານ 3 ດີ ຂອງກະຊວງພາຍໃນ ເຂົ້າຮ່ວມ.

          ການຈັດກອງປະຊຸມໃນຄັ້ງນີ້ ເພື່ອສະຫຼຸບຖອດຖອນບົດຮຽນຄືນກ່ຽວກັບແບບແຜນວິທີນໍາພາ ແລະ ແບບແຜນວິທີເຮັດວຽກ ເປັນຕົ້ນແມ່ນວຽກງານສຶກສາອົບຮົມການເມືອງ-ແນວຄິດ, ການກໍ່ສ້າງພະນັກງານ-ລັດຖະກອນເພດຍິງ, ວຽກງານກອງທຶນພັດທະນາແມ່ຍິງ ແລະ ວຽກງານ 3 ດີ. ພ້ອມທັງເປັນການປະເມີນ ແລະ ກວດກາຄືນກ່ຽວກັບການຈັດຕັ້ງປະຕິບັດໜ້າທີ່ຄວາມຮັບຜິດຊອບຂອງຄະນະບໍລິຫານງານສະຫະພັນແມ່ຍິງ ສະໄໝທີ II ໂດຍປະເມີນຕາມການແບ່ງຄວາມຮັບຜິດຊອບໃນຄະນະບໍລິຫານງານສະຫະພັນແມ່ຍິງກະຊວງພາຍໃນ ທີ່ໄດ້ມີຂໍ້ຕົກລົງຮັບຮອງເອົາແລ້ວນັ້ນ ແລະ ເຜີຍແຜ່ແຈ້ງການຂອງສູນກາງສະຫະພັນແມ່ຍິງລາວ ກ່ຽວກັບການປຸກລະດົມສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ ກະກຽມເຂົ້າຮ່ວມບັ້ນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II.

          ນອກຈາກນີ້, ກອງປະຊຸມຍັງໄດ້ປະກອບຄໍາຄິດຄໍາເຫັນໃສ່ ບົດສະຫຼຸບ ການຊີ້ນໍາ-ນໍາພາ ການເຄື່ອນໄຫວວຽກງານຮອບດ້ານຂອງຄະນະບໍລິຫານງານສະຫະພັນແມ່ຍິງກະຊວງພາຍໃນ ປະຈໍາປີ 2020, ກໍານົດທິດທາງແຜນການເຄື່ອນໄຫວປະຈໍາປີ 2021 ແລະ ບົດສໍາຫຼວດການນໍາພາ ຂອງຄະນະບໍລິຫານງານສະຫະພັນແມ່ຍິງກະຊວງພາຍໃນ ປະຈໍາປີ 2020 ເພື່ອໃຫ້ມີເນື້ອໃນກະທັດຮັດ, ຄົບຖ້ວນ ສາມາດນໍາເອົາໄປຈັດຕັ້ງປະຕິບັດໃຫ້ມີຜົນສໍາເລັດ.

Hits: 22

Leave a Reply

Your email address will not be published. Required fields are marked *