ກະຊວງພາຍໃນ

Ministry of Home Affairs

ກະຊວງພາຍໃນ ຈັດພິທີມອບ-ຮັບ ບັດພະນັກງານ-ລັດຖະກອນໃຫ້ແກ່ 4 ພາກສ່ວນ

ໃນວັນທີ 04 ສິງຫາ 2020  ໄດ້ຈັດໃຫ້ມີພິທີມອບ-ຮັບບັດພະນັກງານ-ລັດຖະກອນ ໃຫ້ແກ່ພະນັກງານ-ລັດຖະກອນ ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ, ຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ ແຫ່ງທີ 1, ພະແນກແຜນການ ແລະ ການລົງທຶນ ນະຄອນຫຼວງວຽງຈັນ ແລະ ສູນສະຖິຕິ ນະຄອນຫຼວງວຽງຈັນ ໂດຍການເຂົ້າຮ່ວມ ເປັນປະທານ ຂອງ ທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດຖະກອນ ກະຊວງພາຍໃນ, ທ່ານ ສີທົນ ດາວພະສິດ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ, ທ່ານ ວິໄຊ ມະນີແສງ ຮອງຄະນະດ່ານສາກົນຂົວມິດຕະພາບລາວ-ໄທ ແຫ່ງທີ 1, ທ່ານ ສິນລະປະກອນ ພົມມະໄຊສີ ຮອງຫົວໜ້າພະແນກແຜນການ ແລະ ການລົງທຶນ ນະຄອນຫຼວງວຽງຈັນ ແລະ ທ່ານ ກາບແກ້ວ ນາມມະຈັກ ຮອງຫົວໜ້າພະແນກພາຍໃນນະຄອນ ຫຼວງວຽງຈັນ ມີ ພະນັກງານ-ລັດຖະກອນ ຂອງພາກສ່ວນດັ່ງກ່າວ ເຂົ້າຮ່ວມ.

ໃນພິທີມອບ-ຮັບບັດພະນັກງານ-ລັດຖະກອນ ຄັ້ງນີ້ ທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດຖະກອນ ກະຊວງພາຍໃນ ໄດ້ໃຫ້ກຽດເຜີຍແຜ່ ຄຳແນະນຳ ເລກທີ 06 ກ່ຽວກັບການອອກບັດພະນັກງານ-ລັດຖະກອນ ເພື່ອແນະນໍາໃຫ້ ພະນັກງານ-ລັດຖະກອນ ທີ່ໄດ້ຮັບບັດໃນເທື່ອນີ້ ໃຫ້ຮັບຮູ້ ແລະ ເຂົ້າໃຈຢ່າງຈະແຈ້ງ ກ່ຽວກັບ ມາດຖານເງື່ອນໄຂ, ຂໍ້ກຳນົດຕ່າງໆ,່ການປະກອບຂໍ້ມູນໃຫ້ຖືກຕ້ອງຕາມລະບຽບການ ແລະ  ຂັ້ນຕອນວິທີການນຳໃຊ້ບັດພະນັກງານ-ລັດຖະກອນ ໃຫ້ຖືກຕ້ອງຕາມລະບຽບກົດໝາຍທີ່ກຳນົດໄວ່.

ການອອກບັດ ພະນັກງານ-ລັດຖະກອນ ແມ່ນເປັນການຢັ້ງຢືນ ແລະ ກວດກາບັນຊີ ຈໍານວນພົນພະນັກງານ-ລັດຖະກອນຜູ້ມີໜ້າ ຫຼື ບໍ່ມີໜ້າຕົວຈິງ ທັງເປັນການປັບປຸງຂໍ້ມູນປະຫວັດລັດຖະກອນ ໃຫ້ຖືກຕ້ອງ ແລະ ຫັນການຄຸ້ມຄອງພະນັກງານ-ລັດຖະກອນ ສູ່ລະບົບທັນສະໄໝ ແລະ ເປັນເອກະພາບໃນການຈັດຕັ້ງປະຕິບັດ ສອດຄ່ອງຕາມກົດໝາຍ ແລະ ລະບຽບການ ເຮັດໃຫ້ການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍຕ່າງໆ ຖືກຕ້ອງຕາມຕົວຈິງ. ບັດພະນັກງານ-ລັດຖະກອນ ແມ່ນບັດໜຶ່ງ ທີ່ອຳນວຍຄວາມສະດວກໃຫ້ແກ່ຜູ້ນຳໃຊ້ ເພາະສາມາດນຳໃຊ້  ແທນບັດປະກັນສັງຄົມ ແລະ ບັດເອທີເອັມ ໃນບັດດຽວ. ການມອບບັດໃນຄັ້ງນີ້ ມີພະນັກງານ-ລັດຖະກອນ ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ຈຳນວນ 35 ຄົນ, ຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ ແຫາງທີ 1 ຈຳນວນ 23 ຄົນ ແລະ ພະແນກແຜນການ ແລະ ການລົງທຶນ ນະຄອນຫຼວງວຽງຈັນ ຈຳນວນ 37 ຄົນ ແລະ ສູນສະຖິຕິ ນະຄອນຫຼວງວຽງຈັນ ຈຳນວນ 12 ຄົນ ທີ່ໄດ້ຮັບບັດພະນັກງານ-ລັດຖະກອນ

Hits: 0

Leave a Reply

Your email address will not be published. Required fields are marked *