ກະຊວງພາຍໃນ

Ministry of Home Affairs

ຍົກລະດັບການຄຸ້ມຄອງຂໍ້ມູນລັດຖະກອນ ແບບເອເລັກໂຕຼນິກ ໃຫ້ພະນັກງານ-ລັດຖະກອນພະແນກພາຍໃນແຂວງຫຼວງພະບາງ

ເພື່ອຫັນການຄຸ້ມຄອງຂໍ້ມູນລັດຖະກອນ ໃຫ້ເຂົ້າສູ່ລະບົບທີ່ທັນສະໄໝຢູ່ຂັ້ນທ້ອງຖິ່ນ ໃນວັນທີ 29 ມິຖຸນາ 2020 ກະຊວງພາຍໃນ ຮ່ວມກັບ ພະແນກພາຍໃນແຂວງຫຼວງພະບາງ ໄດ້ຈັດກອງປະຊຸມຝຶກອົບຮົມການນຳໃຊ້ລະບົບຄຸ້ມຄອງຂໍ້ມູນລັດຖະກອນແບບເອເລັກໂຕຼນິກ ຂຶ້ນໂດຍເປັນປະທານຂອງທ່ານ ສົມພອນ ສີອຸດົມພັນ ຫົວໜ້າພະແນກພາຍໃນແຂວງ, ໃຫ້ກຽດເຂົ້າຮ່ວມມີ ທ່ານ ຄຳກອງ ລາວລີ ຮອງຫົວໜ້າກົມຄຸ້ມຄອງລັດຖະກອນ ກະຊວງພາຍໃນ, ມີພະນັກງານຈາກບັນດາພະແນກການ ແລະ ອົງການທຽບເທົ່າ ຈໍານວນ 33 ພາກສ່ວນອ້ອມຂ້າງແຂວງຫຼວງພະບາງ ເຂົ້າຮ່ວມ.

ການຈັດຝຶກອົບຮົມໃນຄັ້ງນີ້ ກໍເພື່ອເຮັດໃຫ້ຜູ້ເຂັ້າຮ່ວມໄດ້ຮັບຮູ້ ແລະ ເຂົ້າໃຈ ໃນການນໍາໃຊ້ລະບົບຄຸ້ມຄອງຂໍ້ມູນລັດຖະກອນ ແບບເອເລັກໂຕນິກ ໃນການຈັດຕັ້ງປະຕິບັດວຽກງານ ເປັນຕົ້ນແມ່ນ ການເລື່ອນຊັ້ນ-ຂັ້ນ, ການສະເໜີຍົກຍ້າຍ, ການດັດແກ້ຂໍ້ມູນ, ການຮັບອຸດໜູນໃໝ່, ການຢຸດເຊົາອຸດໜູນ, ການຜ່ານຈໍານວນພົນ, ການຄິດໄລ່ເງິນເດືອນ ແລະ ອື່ນໆ ໃຫ້ເປັນລະບົບ ແລະ ສາມາດຄຸ້ມຄອງຂໍ້ມູນທີ່ຢູ່ໃນຂົງເຂດຄວາມຮັບຜິດຊອບຂອງຕົນໄດ້ຢ່າງຖືກຕ້ອງ ແລະ ຊັດເຈນກວ່າເກົ່າ.

ທ່ານ ສຸວັນທອນ ມະນີພັນ ຮອງຫົວໜ້າພະແນກພາຍໃນແຂວງ ໄດ້ກ່າວຕໍ່ຊຸດຝຶກອົບຮົມວ່າ ການຈັດຝຶກອົບຮົມຄັ້ງນີ້ມີຄວາມໝາຍສໍາຄັນຢ່າງຍີ່ງ ໃນການພັດທະນາລະບົບຄຸ້ມຄອງຂໍ້ມູນລັດຖະກອນ ໃຫ້ມີຄວາມວ່ອງໄວ ແລະ ທັນສະໄໝຫຼາຍຂຶ້ນ ພ້ອມທັງຮັບປະກັນທາງດ້ານຄວາມປອດໄພ ສະນັ້ນຮຽກຮ້ອງໃຫ້ບັນດາຜູ້ເຂົ້າຮ່ວມທັງຫຼາຍ ຈົ່ງ ພ້ອມກັນຍົກສູງຄວາມຮັບຜິດຊອບໃນການຄົ້ນຄວ້າ ແລກປ່ຽນບົົດຮຽນທາງດ້ານວິຊາການ ຍົກບັນຫາດ້ານດີ ຂໍ້ຫຍຸ້ງຍາກ ພ້ອມທັງຊອກຫາວິທີການແກ້ໄຂ ພ້ອມນໍາເອົາຄວາມຮູ້ທີ່ໄດ້ໄປພັດທະນາການປະຕິບັດວຽກງານຕົວຈິງໃຫ້ດີຂຶ້ນໄປເລື້ອຍໆ.

ໃນກອງປະຊຸມທ່ານຄຳກອງ ລາວລີ ຮອງຫົວໜ້າກົມຄຸ້ມຄອງລັດຖະກອນ ໄດ້ຕາງໜ້າໃຫ້ຄະນະພັກ-ຄະນະນໍາກະຊວງພາຍໃນ ມອບຄອມພີວເຕີຈຳນວນ 01 ຊຸດໃຫ້ພະແນກພາຍໃນແຂວງຫຼວງພະບາງ ເພື່ອຮັບໃຊ້ເຂົ້າໃນວຽກງານຄຸ້ມຄອງລັດຖະກອນແບບເອເລັກໂຕຼນິກ ຕາງໜ້າຮັບໂດຍທ່ານ ສົມພອນ ສີອຸດົມພັນ ຫົວໜ້າພະແນກພາຍໃນແຂວງ. ການຝຶກອົບຮົມຈະດໍາເນີນໄປເປັນເວລາ 05 ວັນ.

Hits: 0

Leave a Reply

Your email address will not be published. Required fields are marked *