ກະຊວງພາຍໃນ

Ministry of Home Affairs

ຄະນະນໍາ, ສະມາຊິກພັກ ແລະ ພະນັກງານຫຼັກແຫຼ່ງ ກະຊວງພາຍໃນ ເຊື່ອມຊືມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ແລະ ດໍາລັດ ວ່າດ້ວຍຄວາມຮັບຜິດຊອບໃນການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ

ວັນທີ 09 ກໍລະກົດ 2020 ນີ້ ກົມກວດກາ ກະຊວງພາຍໃນ ໄດ້ຈັດກອງປະຊຸມເຜີຍແຜ່, ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ແລະ ດໍາລັດ ວ່າດ້ວຍຄວາມຮັບຜິດຊອບໃນການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ໂດຍການເປັນປະທານຂອງ           ທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງພາຍໃນ, ມີຄະນະບໍລິຫານງານພັກກະຊວງ, ບັນດາຄະນະໜ່ວຍພັກ, ສະມາຊິກພັກ ແລະ ພະນັກງານຫຼັກແຫຼ່ງ ເຂົ້າຮ່ວມທັງໝົດ 300 ກວ່າທ່ານ.

          ຈຸດປະສົງຂອງກອງປະຊຸມໃນຄັ້ງນີ້ ເພື່ອໃຫ້ຄະນະບໍລິຫານງານພັກກະຊວງ, ຄະນະໜ່ວຍພັກ, ສະມາຊິກພັກ ແລະ ພະນັກງານຫຼັກແຫຼ່ງ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ແລະ ຜັນຂະຫຍາຍ ດໍາລັດ ວ່າດ້ວຍຄວາມຮັບຜິດຊອບໃນການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ເຂົ້າໃນການຈັດຕັ້ງປະຕິບັດວຽກງານຕົວຈິງທີ່ຮັບຜິດຊອບໃຫ້ໄດ້ຮັບຜົນດີ.          

ໃນໂອກາດນີ້ ທ່ານ ຄໍາໝັ້ນ ສູນວິເລີດ ໄດ້ໃຫ້ກຽດເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ໂດຍທ່ານໄດ້ຍົກໃຫ້ເຫັນບາງບັນຫາທີ່ຕິດພັນກັບວຽກງານຂະແໜງພາຍໃນ ພ້ອມທັງເຈາະຈີ້ມໃຫ້ຜູ້ເຂົ້າຮ່ວມກອງປະຊຸມປະກອບຄໍາຄິດຄໍາເຫັນໃສ່ເນື້ອໃນມະຕິດັ່ງກ່າວຢ່າງພາວະວິໄສ ແລະ ແທດເໝາະກັບຕົວຈິງ. ຈາກນັ້ນ, ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ ໄດ້ຂຶ້ນເຜີຍແຜ່ດໍາລັດ ສະບັບເລກທີ 127/ລບ ລົງວັນທີ 20 ກຸມພາ 2020 ວ່າດ້ວຍຄວາມຮັບຜິດຊອບໃນການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະ ຄໍາສັ່ງແນະນໍາ ສະບັບເລກທີ 10/ຄຕຟງ ລົງວັນທີ 08 ມັງກອນ 2020 ວ່າດ້ວຍການ    ດໍາເນີນຄະດີຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ເຊິ່ງດໍາລັດດັ່ງກ່າວ ວາງອອກເພື່ອຜັນຂະຫຍາຍກົດໝາຍ ວ່າດ້ວຍການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແນ່ໃສ່ເຮັດໃຫ້ການເຄື່ອນໄຫວຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ຂອງກະຊວງ, ອົງການ ແລະ ຫົວໜ່ວຍທີ່ມີໜ້າທີ່ລາຍງານໃຫ້ມີຄວາມຈະແຈ້ງ ແລະ ເປັນເອກະພາບ ໃນການຈັດຕັ້ງປະຕິບັດ.

Hits: 0

Leave a Reply

Your email address will not be published. Required fields are marked *