ກະຊວງພາຍໃນ

Ministry of Home Affairs

ກອງປະຊຸມສະຫຼຸບການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ທ້າຍປີ 2020 ຂອງຫ້ອງການ ກະຊວງພາຍໃນ

ກອງປະຊຸມສະຫຼຸບການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ທ້າຍປີ 2020 ຂອງຫ້ອງການ ກະຊວງພາຍໃນ ໄດ້ຈັດຂຶ້ນໃນວັນທີ 29 ກໍລະກົດ 2020 ທີ່ ຫ້ອງປະຊຸມຊັ້ນ IV ຂອງ ກະຊວງພາຍໃນ ໂດຍການເປັນປະທານ ຂອງ ທ່ານ ສິງທະວອນ ດາລາວົງ ຫົວໜ້າຫ້ອງການ ກະຊວງພາຍໃນ, ເຂົ້າຮ່ວມມີ ທ່ານ ນ. ຄຳພູນ ແກ້ວສະຫວັນ ຜູ້ຊ່ວຍຄະນະນຳ ກະຊວງພາຍໃນ, ຮອງຫົວໜ້າຫ້ອງການ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານ-ລັດຖະກອນ ຫ້ອງການ ກະຊວງພາຍໃນເຂົ້າຮ່ວມ.

ກອງປະຊຸມໃນຄັ້ງນີ້ ແມ່ນເພື່ອສະຫຼຸບການເຄື່ອນໄຫວຈັດຕັ້ງປະຕິບັດວຽກງານ ໃນໄລຍະ 06 ເດືອນຕົ້ນປີ ແລະ ວາງທິດທາງແຜນການເຄື່ອນໄຫວວຽກງານ  06 ເດືອນທ້າຍປີ 2020 ຂອງ ຫ້ອງການ ກະຊວງພາຍໃນ ກໍ່ຄືການຈັດຕັ້ງປະຕິບັດວຽກງານຂອງ ແຕ່ລະພະແນກການທີ່ສັງກັດຫ້ອງການ ໃນກອງປະຊຸມດັ່ງກ່າວ ບັນດາຄະນະພະແນກ ໄດ້ຂຶ້ນລາຍງານສະພາບລວມໃນການຈັດຕັ້ງເຄື່ອນໄຫວວຽກງານໃນຜ່ານມາ ຂໍ້ສະດວກ, ຂໍ້ຫຍຸ້ງຍາກ, ຂໍ້ສະເໜີຕ່າງໆ ແລະ ທິດທາງແຜນການ ເຄື່ອນໄຫວວຽກງານໃນ 06 ເດືອນທ້າຍປີ ໃນຕໍ່ໜ້າ.

ໃນໂອກາດນີ້ ທ່ານ ນ. ຄຳພູນ ແກ້ວສະຫວັນ ຜູ້ຊ່ວຍຄະນະນຳ ກະຊວງພາຍໃນ ໄດ້ໃຫ້ກຽດມີຄຳເຫັນຕໍ່ກອງປະຊຸມ ເຊິ່ງທ່ານໄດ້ຍ້ອງຍໍຊົມເຊີມຕໍ່ຜົນສຳເລັດໃນການຈັດຕັ້ງປະຕິບັດວຽກງານຂອງ ຫ້ອງການໃນໄລຍະຜ່ານມາ ແລະ  ພ້ອມທັງໄດ້ເນັ້ນ ໃຫ້ ພະນັກງານ-ລັດຖະກອນ ຫ້ອງການ ທຸກທ່ານ ຈົ່ງເອົາໃຈໃສ່ຕັ້ງໜ້າປະຕິບັດວຽກງານທີ່ໄດ້ຮັບມອບໝາຍຢ່າງມີຫົວຄິດປະດິດສ້າງ ແລະ ມີຄວາມຮັບຜິດຊອບສູງ, ສືບຕໍ່ບຸກບືນເຄື່ອນໄຫວວຽກງານຕາມການມອບໝາຍ ໃຫ້ບັນລຸຜົນສຳເລັດຍິ່ງໃຫ່ຍກວ່າເກົ່າ.

​ໃນ​ຕອນ​ທ້າຍ​ຂອງ​ກອງ​ປະຊຸມ ທ່ານ ສິງທະວອນ ດາລາວົງ ຫົວໜ້າຫ້ອງການ ປະທານກອງປະຊຸມ ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ຊຶ່ງທ່ານໄດ້ຮຽກຮ້ອງ ໃຫ້ຄະນະພະແນກ ແລະ ພະນັກງານ-ລັດຖະກອນ ຈົ່ງພ້ອມກັນຍົກສູງຄວາມຮັບຜິດຊອບຂອງຕົນ ຕາມພາລະບົດບາດໜ້າທີ່ ທີ່ໄດ້ຮັບມອບໝາຍ, ເອົາໃຈໃສ່ຄົ້ນຄວ້າພັດທະນາຄວາມຮູ້ຄວາມສາມາດວຽກງານວິຊາສະເພາະໃນຂົງເຂດທີ່ຕົນຮັບຜິດຊອບ  ແລະ ສືບຕໍ່ເຄື່ອນໄຫວວຽກງານຕາມແຜນການ 06 ເດືອນທ້າຍປີ ໃຫ້ສຳເລັດຕາມທິດທາງແຜນການທີ່ໄດ້ວາງໄວ້ ຢ່າງມີປະສິດທິພາບ ແລະ ປະສິດທິຜົນ.

Hits: 0

Leave a Reply

Your email address will not be published. Required fields are marked *