ກະຊວງພາຍໃນ

Ministry of Home Affairs

ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມການປົກຄອງທ້ອງຖິ່ນ ກະຊວງພາຍໃນ

ກອງປະຊຸມໃຫ່ຍ ຄັ້ງທີ II  ໜ່ວຍພັກກົມການປົກຄອງທ້ອງຖິ່ນ ກະຊວງພາຍໃນ ໄດ້ເປັນເອກະພາບ ບົນພື້ນຖານຫຼັກການລວມສູນປະຊາທິປະໄຕ,ຖືກຕ້ອງ ແລະ ສອດຄ່ອງກັບມາດຖານ, ເງື່ອນໄຂ ທີ່ໄດ້ກຳນົດໄວ້ ປ່ອນບັດເລືອກເອົາ  ສະຫາຍ ຄຳພັນ ສັກລາສິງ ເປັນເລຂາໜ່ວຍພັກຊຸດໃໝ່ ແລະ ເລືອກເອົາ ສະຫາຍ ຂັນອຸທອນ ເພັດລາສີ ເປັນຮອງເລຂາໜ່ວຍພັກ ພ້ອມທັງຍັງໄດ້ ເລືອກເອົາ ສະຫາຍ ລາຕີ ພິມມະຈັກ ເປັນກຳມະການພັກ ທັງເປັນຜູ້ກວດກາໜ່ວຍພັກ, ເຊິ່ງກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 18 ມິຖຸນາ  2020  ໂດຍການເຂົ້າຮ່ວມ ຂອງ ສະຫາຍ ຄຳມູນ ວິພົງໄຊ, ຮອງເລຂາຄະນະພັກ, ຮອງລັດຖະມົນຕີກະຊວງພາຍໃນ ມີ ເລຂາ, ຮອງເລຂາໜ່ວຍພັກ ຈາກຫ້ອງການ, ບັນດາກົມ, ສະຖາບັນ, ສູນ, ຕາງໜ້າ 3 ອົງການຈັດຕັ້ງມະຫາຊົນກະຊວງພາຍໃນ, ສະມາຊິກພັກສົມບູນ ແລະ ສຳຮອງຂອງໜ່ວຍພັກກົມການປົກຄອງທ້ອງຖິ່ນເຂົ້າຮ່ວມ.

ກອງປະຊຸມຄັ້ງນີ້ ໄດ້ສະຫຼຸບຕີລາຄາການຊີ້ນຳ-ນຳພາຮອບດ້ານ ກໍ່ຄືການເຄື່ອນໄຫວໃນການຈັດຕັ້ງປະຕິບັດພາລະບົດບາດ ແລະ ໜ້າທີ່ວິຊາສະເພາະໃນໄລຍະ 5 ປີ ຜ່ານມາ ຂອງໜ່ວຍພັກກົມການປົກຄອງທ້ອງຖິ່ນ ເພື່ອຍົກໃຫ້ເຫັນຜົນສຳເລັດຫຼາຍດ້ານທີ່ພົ້ນເດັ່ນ ທີ່ຈະຕ້ອງໄດ້ສືບຕໍ່ສົ່ງເສີມ ແລະ ດ້ານອ່ອນ, ຂໍ້ຄົງຄ້າງ ທີ່ໜ່ວຍພັກຈະຕ້ອງໄດ້ພ້ອມກັນຄົ້ນຄວ້າແກ້ໄຂໃນຕໍ່ໜ້າ ທີ່ໄດ້ສະແດງອອກໃນບົດລາຍງານການເມືອງຂອງໜ່ວຍພັກ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກໃນໄລຍະ 5 ປີຜ່ານມາ ເຊິ່ງເປັນຂີດໝາຍທີ່ສຳຄັນ ໃນການສືບຕໍ່ປັບປຸງບົດບາດການນຳພາຂອງຄະນະໜ່ວຍພັກ ແລະ ປັບປຸງຄຸນນະພາບຂອງບັນດາສະມາຊິກພາຍໃນໜ່ວຍພັກໃຫ້ເຂັ້ມແຂງ ແລະ ໜັກແໜ້ນຍິ່ງຂຶ້ນ.

ໃນຕອນທ້າຍກອງປະຊຸມ ສະຫາຍ ຄຳມູນ ວິພົງໄຊ, ຮອງເລຂາຄະນະພັກ, ຮອງລັດຖະມົນຕີກະຊວງພາຍໃນ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍສະຫາຍໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ໃນການຊີ້ນຳ-ນຳພາ ຂອງຄະນະໜ່ວຍພັກຊຸດເກົ່າ ທີ່ໄດ້ຊີ້ນຳ-ນຳພາ ສະມາຊິກພັກ, ພະນັກງານ-ລັດຖະກອນ ເອົາໃຈໃສ່ ປະຕິບັດໜ້າທີ່ການເມືອງ ແລະ ວຽກງານວິຊາສະເພາະຂອງຕົນໄດ້ຮັບຜົນສຳເລັດ​ຫຼາຍດ້ານ ພ້ອມນັ້ນ ສະຫາຍ ຍັັງໄດ້ເນັ້ນ ໃຫ້ຄະນະໜ່ວຍພັກຊຸດໃໝ່ ຈົ່ງເອົາໃຈໃສ່ຄົ້ນຄວ້າເຊື່ອມຊຶມກຳແໜ້ນແນວທາງນະໂຍບາຍຂອງພັກ ທີຕິດພັນກັບວຽກງານວິຊາສະເພາະ; ເປັນໃຈກາງໃນການເຕົ້າໂຮມຄວາມສາມັກຄີພາຍໃນ;  ເພີ່ມທະວີວຽກງານສຶກສາອົບຮົມການເມືອງແນວຄິດ, ເອົາໃຈໃສ່ນຳພາ-ຊີ້ນຳ ສະພາຊິກພັກ, ພະນັກງານລັດຖະກອນ ຍົກສູງຄວາມຮັບຜິດຊອບ ໃນການປະຕິບັດໜ້າທີ່ການເມືອງຄຽງຄູ່ກັບວຽກວິຊາສະເພາະຂອງຕົນ ຕາມການມອບໝາຍຂອງ ຄະນະພັກ-ຄະນະນຳ ກະຊວງ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.

Hits: 0

Leave a Reply

Your email address will not be published. Required fields are marked *