ກະຊວງພາຍໃນ

Ministry of Home Affairs

ລັດຖະມົນຕີກະຊວງພາຍໃນ ຊຸກຍູ້ວຽກງານຂະແໜງພາຍໃນ ຢູ່ແຂວງອຸດົມໄຊ

ວັນ​ທີ 19 ມິຖຸນາ 2020 ທີ່​ຜ່ານ​ມາ​ນີ້, ທ່ານ​ ຄໍາໝັ້ນ ສູນ​ວິ​ເລີດ ກໍາມະການ​ສູນ​ກາງ​ພັກ ລັດຖະມົນຕີ​ກະຊວງ​ພາຍ​ໃນ ພ້ອມ​ດ້ວຍ​ຄະນະ ​ໄດ້​ລົງ​ຊຸກຍູ້​ ​ແລະ ຕິດຕາມ​ວຽກງານ​ຂະ​ແໜງພາຍ​ໃນ ຢູ່​ທີ່ພະ​ແນ​ກພາຍ​ໃນ​ແຂວງ​ອຸດົມ​ໄຊ ​ໂດຍ​ການ​ຕ້ອນຮັບ​ຈາກ​ທ່ານ ພົມມາ ວັນນະ​ກໍາ ກໍາມະການ​ພັກ​ແຂວງ ຫົວໜ້າພະ​ແນ​ກພາຍ​ໃນ​ແຂວງ​ອຸດົມ​ໄຊ ພ້ອມ​ທັງ​ຫົວໜ້າ ​ແລະ ຮອງ​ຫົວໜ້າຫ້ອງການ​ພາຍ​ໃນ​ເມືອງ​ທັງ 7 ​ເມືອງ ​ແລະ ພະນັກງານ​ທີ່​ກ່ຽວຂ້ອງ.

          ການລົງ​ຊຸກຍູ້​ ​ແລະ ຕິດຕາມ​ວຽກງານຂະແໜງພາຍໃນຄັ້ງນີ້ ທ່ານລັດຖະມົນຕີກະຊວງພາຍໃນ ​ໄດ້ຮັບຟັງການ​ລາຍ​ງານ​ສະພາບ​ການຈັດ​ຕັ້ງ​ປະຕິບັດ​ວຽກງານ​ພາຍໃນ ​ໄລຍະ​ຜ່ານ​ມາ ຈາກທ່ານ ພົມມາ ວັນນະກໍາ ກໍາມະການພັກແຂວງ ຫົວໜ້າພະແນກພາຍໃນແຂວງອຸດົມໄຊ ​ໂດຍໄດ້ຍົກໃຫ້ເຫັນ​ໄລຍະ​​ຜ່ານ​ມາຄະ​ນະ​ພັກ ຄະນະ​ພະ​ແນ​ກພາຍ​ໃນ​ແຂວງ​ອຸດົມ​ໄຊ ​ໄດ້​ປະຕິບັດ​ພາລະ​ບົດບາດ​ເປັນ​ເສນາ​ທິການ​ໃຫ້​ແກ່​ເຈົ້າ​ແຂວງ ​ແລະ ກະຊວງ​ພາຍ​ໃນ ​ໃນ​ການ​ຄຸ້ມ​ຄອງ​ມະ​ຫາ​ພາກ​ຢູ່​ຂັ້ນ​ທ້ອງ​ຖິ່ນກ່ຽວກັບ​ວຽກງານ​ພັດທະນາ​ການ​ບໍລິຫານ​ລັດ, ວຽກງານ​ປົກຄອງ, ວຽກງານ​ແຜ່ນ​ທີ່, ວຽກງານ​ຄຸ້ມ​ຄອງ​ລັດຖະກອນ, ວຽກງານ​ຄຸ້ມ​ຄອງ​ເອກະສານ, ວຽກງານ​ແຂ່ງຂັນ ​ແລະຍ້ອງຍໍ, ວຽກງານ​ຄຸ້ມ​ຄອງ​ພົນລະ​ເມືອງ ​ແລະ ວຽກງານ​ຊົນ​ເຜົ່າ ​ແລະສາສະໜາ, ​​ໃນ​ນີ້, ວຽກງານ​ທີ່​ພົ້ນ​ເດັ່ນ​ແມ່ນ​ການ​ຄົ້ນຄວ້າ​ກໍານົດປັບປຸງ​ກົງຈັກ​ການຈັດ​ຕັ້ງ ​ແລ​ະ ປັບປຸງ​ພາລະ​ບົດບາດ​ຂັ້ນ​ແຂວງ, ຂັ້ນ​ເມືອງໃຫ້​ດໍາ​ເນີນ​ໄປ​ຕາມ​ທິດ “ກະທັດ​ຮັດ, ສົມ​ເຫດ, ສົມ​ຜົນ ​ແລະ ຖືກຕ້ອງ​ຕາມ​ສະພາບ​ຄວາມ​ເປັນ​ຈິງ​ຂອງ​ແຂວງ”​ ​ມາ​ຮອດ​ປະຈຸ​ບັນ​ສາມາດ​ປັບປຸງ​ກົງຈັກ​ການຈັດ​ຕັ້ງ ຈໍານວນ 12 ພາກສ່ວນ ​ເທົ່າ​ກັບ 60%, ກວດກາ​ການ​ກໍານົດ​ຕໍາ​ແໜ່ງງານ​ໄດ້ 30 ພາກສ່ວນ ​ເທົ່າ​ກັບ88%, ປັບປຸງ​ພາລະ​ບົດບາດ​ໄດ້ 44 ພາກສ່ວນ ​ເທົ່າ​ກັບ 94%. ຄ່ຽງຄູ່​ກັນ​ນີ້, ຍັງ​ໄດ້​ເປັນ​ເຈົ້າ​ການ​ໃນ​ການ​ປະສານ​ສົມທົບ​ກັບ​ພາກສ່ວນ​ທີ່​ກ່ຽວຂ້ອງ​ຈັດ​ຕັ້ງ​ປະຕິບັດ​ໂຄງການ​ປັບປຸງ​ບູລະນະ​ການ​ປົກຄອງ ​ແລະ ​ໂຄງການ​ພັດທະນາ​ເມືອງ​ ​ໄດ້​ຮັບ​ຜົນ​ສໍາ​ເລັດ​ຕາມ​ແຜນການ​ທີ່​ກໍານົດ​ໄວ້, ຄຽງຄູ່​ກັບ​ຜົນ​ສໍາ​ເລັດ​ຍັງ​ມີ​ດ້ານ​ອ່ອນ ​ແລະ ຂໍ້​ຫຍຸ້ງຍາກ​ໃນ​ການຈັດຕັ້ງ​ປະຕິບັດ​ວຽກງານຈໍານວນໜຶ່ງ ເປັນຕົ້ນ​ແມ່ນ ​ການ​ໂຮມ ​ແລະຍຸບ​ເລີກກົງຈັກ​ການຈັດ​ຕັ້ງໃຫ້​ໄປ​ຕາມ​ທິດ​ກະທັດ​ຮັດ, ສົມ​ເຫດ​ສົມ​ຜົນ, ການ​ສ້າງ​ຕັ້ງ​ເມືອງ​ເທດສະບານ ​ແລະ ການ​ສ້າງ​ຕັ້ງໜ່ວຍງານ​ບໍລິການ​ຜ່ານ​ປະຕູ​ດຽວ, ການ​ກໍານົດ​ເຂດ​ຫ່າງ​ໄກ​ສອກຫຼີກ, ການ​ເຄື່ອນ​ໄຫວ​ຂອງ​ອົງການ​ປົກຄອງ​ບ້ານ​ຢູ່​ເຂດ​ຊົນນະບົດ​ຍັງ​ບໍ່​ທັນ​ເຂັ້ມ​ແຂງ,ການ​ກໍານົດ​ເຂດ​ແດນ​ເຊື່ອມ​ຕໍ່​ລະຫວ່າງ​ແຂວງ​ຕໍ່​ແຂວງ ແລະ ​ເມືອງ​ຕໍ່​ເມືອງ​ຍັງມີ​ບາງ​ຈຸດບໍ່ທັນສໍາເລັດ.

          ​ພ້ອມນີ້, ທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ລັດຖະມົນຕີກະຊວງພາຍໃນ ​ໄດ້​ໂອ້​ລົມ​ຕໍ່ຄະນະ​ພະ​ແນ​ກ, ຄະນະ​ຫ້ອງການ​ພາຍ​ໃນ​ເມືອງ ​ແລະ ພະນັກງານ-ລັດຖະກອນ ຂອງ​ພະ​ແນ​ກພາຍ​ໃນ​ແຂວງ​ອຸດົມ​ໄຊ ​ໂດຍ​ທ່ານ​ໄດ້​ເນັ້ນ​ໃຫ້ຂະແໜງພາຍໃນແຂວງອຸດົມໄຊ ​ເອົາ​ໃຈ​ໃສ່​​ວຽກງານ​ປັບປຸງ​ກົງຈັກ​ການຈັດ​ຕັ້ງ ​ໃຫ້​ມີ​ຄວາມ​ເໝາະສົມ ​ແລະ ຮັດກຸມ​ທີ່​ສຸດ, ວຽກງານ​​ແຂ່ງຂັນ ​ແລະ ຍ້ອງຍໍ ​​ຕ້ອງ​ຕິດ​ພັນ​ກັບ​ວຽກງານ 3 ສ້າງ ​​​ໂດຍເລັ່ງ​ໃສ່​ປັບປຸງ​ອົງການ​ປົກຄອງ​ບ້ານ​ໃຫ້​ມີ​ຄວາມ​ເຂັ້ມ​ແຂງ, ສຸມ​ໃສ່​ວຽກງານ​ຄຸ້ມ​ຄອງ​ລັດຖະກອນ, ​ເອົາ​ໃຈ​ໃສ່​ຄົ້ນຄວ້າ​ປະຕິບັດ​ນະ​ໂຍບາຍ, ​ເກັບ​ກໍາ-ຄຸ້ມ​ຄອງ​ສະຖິຕິ, ປະ​ເມີນ​ຜົນ​ລັດຖະກອນ ​ແລະ ການກວດ​ຜ່ານ​ຈໍານວນ​ພົນ​ໃຫ້ມີ​ຄວາມ​ຖືກຕ້ອງ ​ແລະ ຊັດ​ເຈນ.

ນອກຈາກ​ນີ້, ທ່ານ ຄໍາໝັ້ນ ສູນວິເລີດ ໄດ້ຕາງໜ້າໃຫ້ຄະນະພັກ ຄະນະນຳ ກໍຄື ພະນັກງານ-ລັດຖະກອນ ກະຊວງພາຍໃນ ​ມອບ​ຄອມ​ພິວ​ເຕີ ຈໍານວນ 07 ຊຸດ ​ແລະ ປີ່​ນ​ເຕີ ຈໍານວນ 07 ​ເຄື່ອງ​ ​ລວມມູນ​ຄ່າ​ 38.808.000 ກີບໃຫ້​ບັນດາ​ຫ້ອງການ​ພາຍ​ໃນ​ເມືອງ ຂອງ​ແຂວງ​ອຸດົມ​ໄຊ​ ​ເພື່ອ​ນໍາ​ໃຊ້​ເຂົ້າ​ໃນ​ການ​ປະຕິບັດ​ວຽກງານໃຫ້ມີຄວາມສະດວກ ແລະ ວ່ອງໄວ ໃນການບໍລິການຮັບໃຊ້ປະຊາຊົນ ໃຫ້ນັບມື້ນັບດີຂຶ້ນ. ໃນໂອກາດດຽວກັນນີ້, ທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ລັດຖະມົນຕີກະຊວງພາຍໃນ ພ້ອມ​ດ້ວຍ​ຄະນະ ໄດ້​ເຂົ້າ​ພົບ ​ທ່ານ ປອ ຄໍາ​ພັນ ​ເຜີຍຍະ​ວົງ ​ເລຂາ​ພັກ​ແຂວງ ​ເຈົ້າ​ແຂວງ​ແຂວງ​ອຸດົມ​ໄຊ ​ແລະ ໄດ້ລົງ​ຢ້ຽມຢາມພື້ນຖານການຜະລິດຢູ່​ກຸ່ມ​ບ້າ​ນໂພນ​ໂຮມ ​ເມືອງ​ໄຊ ​ແຂວງ​ອຸດົມ​ໄຊ ຕື່ມອີກ​ດ້ວຍ.

Hits: 0

Leave a Reply

Your email address will not be published. Required fields are marked *