ກະຊວງພາຍໃນ

Ministry of Home Affairs

ກົມແຂ່ງຂັນ ແລະ ຍ້ອງຍໍ ກະຊວງພາຍໃນ ລົງເຜີຍແຜ່ດຳລັດວ່າດ້ວຍການແຂ່ງ ຂັນ ແລະ ຍ້ອງຍໍ ທີ່ແຂວງໄຊຍະບູລີ

ວັນທີ 12 ມີນາ 2020 ນີ້ ກົມແຂ່ງຂັນ ແລະ ຍ້ອງຍໍ ກະຊວງພາຍໃນ ໄດ້ລົງເຜີຍແຜ່ດຳລັດວ່າດ້ວຍການແຂ່ງຂັນ ແລະ ຍ້ອງຍໍ ໃຫ້ພະນັກງານທີ່ເຮັດວຽກງານແຂ່ງຂັນ ແລະ ຍ້ອງຍໍ ຂອງແຂວງໄຊຍະບູລີ ໂດຍການໃຫ້ກຽດເຂົ້າຮ່ວມຂອງ ທ່ານ ຄຳສີ ແພງສະຫັວນ ຫົວໜ້າພະແນກພາຍໃນແຂວງໄຊຍະບູລີ ແລະ ທ່ານ ນາງ ສີດາ ວິຈິດວົງສາ ຮອງຫົວໜ້າກົມແຂ່ງຂັນ ແລະ ຍ້ອງຍໍ ມີບັນດາຮອງຫົວໜ້າພະແນກການຂອງແຂວງ, ຫົວໜ້າຫ້ອງການຂັ້ນເມືອງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

          ທ່ານ ນາງ ສີດາ ວິຈິດວົງສາ ຮອງຫົວໜ້າກົມແຂ່ງຂັນ ແລະ ຍ້ອງຍໍ ກະຊວງພາຍໃນ ໄດ້ໃຫ້ກຽດຂື້ນເຜີຍແຜ່ດຳລັດວ່າດ້ວຍການແຂ່ງຂັນ ແລະ ຍ້ອງຍໍ ສະບັບເລກທີ 116/ລບ, ລົງວັນທີ 22 ເມສາ 2019 ເຊີ່ງໄດ້ຍົກໃຫ້ເຫັນຈຸດປະສົງ ແລະ ຄວາມໝາຍຄວາມສໍາຄັນຂອງດໍາລັດສະບັບດັ່ງກ່າວ ທີ່ປະກອບມີທັງໝົດ 12   ໜວດ ແລະ 70 ມາດຕາ. ພ້ອມກັນນັ້ນ ໄດ້ເຜີຍແຜ່ຄໍາແນະນໍາກ່ຽວກັບການຈັດຕັ້ງຜັນຂະຫຍາຍດຳລັດວ່າດ້ວຍການແຂ່ງຂັນ ແລະ ຍ້ອງຍໍ ສະບັບເລກທີ 01/ພນ, ລົງວັນທີ 07 ກຸມພາ 2020 ທີ່ລວມມີ 6 ໜວດ 50 ມາດຕາ. ເອກະສານສອງສະບັບດັ່ງກ່າວແມ່ນໄດ້ກໍານົດຫຼັກການ, ລະບຽບການ ແລະ ມາດຕະການກຽ່ວກັບການຄຸ້ມຄອງ ຕິດຕາມການເຄື່ອນໄຫວວຽກງານແຂ່ງຂັນ ແລະ ຍ້ອງຍໍ ເຮັດໃຫ້ການຈັດຕັ້ງປະຕິບັດວຽກງານດັ່ງກ່າວມີປະສິດທິພາບ, ປະສິດທິຜົນ ແລະ ມີຄວາມເປັນເອກະພາບໃນຂອບເຂດທົ່ວປະເທດ.

ດຳລັດວ່າດ້ວຍການແຂ່ງຂັນ ແລະຍ້ອງຍໍ ແລະ ຄໍາແນະນໍາກ່ຽວກັບການຈັດຕັ້ງຜັນຂະຫຍາຍດຳລັດວ່າດ້ວຍການແຂ່ງຂັນ ແລະ ຍ້ອງຍໍ ແມ່ນແນໃສ່ສ້າງເງື່ອນໄຂຊຸກຍູ້ ສົ່ງເສີມຫົວຄິດປະດິດສ້າງ ແລະ ຜົນງານດີ ເດັ່ນຂອງບຸກຄົນ, ນິຕິບຸກຄົນ ແລະ ການຈັດຕັ້ງ ເຂົ້າຮ່ວມໃນການແຂ່ງຂັນ ແລະ ຍ້ອງຍໍ ໃຫ້ເປັນຂະບວນການແຂງແຮງ ກ້ວາງຂວາງ ແລະ ເລິກເຊີ່ງ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

Hits: 0

Leave a Reply

Your email address will not be published. Required fields are marked *