ກະຊວງພາຍໃນ

Ministry of Home Affairs

ກອງປະຊຸມສະຫຼຸບວຽກງານຂະແໜງພາຍໃນ ທົ່ວແຂວງໄຊຍະບູລີ ປະຈໍາປີ 2019 ໄດ້ສໍາເລັດລົງຢ່າງເປັນທາງການ ໃນວັນທີ 17 ມີນາ 2020 ພາຍຫຼັງທີ່ໄດ້ດໍາເນີນມາເປັນເວລາ 2 ວັນ. ໂດຍການເຂົ້າຮ່ວມຂອງ ທ່ານ ຄໍາໝັ້ນ ສູນວິເລີດ ລັດຖະມົນຕີກະຊວງພາຍໃນ ແລະ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ມີບັນດາຫົວໜ້າ-ຮອງຫົວໜ້າພະແນກການ, ອົງການ, ກົມກອງອ້ອມຂ້າງແຂວງ, ບັນດາທ່ານເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າຫ້ອງການພາຍໃນ 11 ເມືອງ ພ້ອມດ້ວຍພະນັກງານ-ວິຊາການ ພະແນກພາຍໃນແຂວງ ເຂົ້າຮ່ວມ.

        ກອງປະຊຸມໃນຄັ້ງນີ້ ຜູ້ແທນກອງປະຊຸມໄດ້ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິ ບັດວຽກງານພາຍໃນ ປະຈໍາປີ 2019 ແລະ ທິດທາງແຜນການ ປະຈໍາປີ 2020 ໂດຍໄດ້ຍົກໃຫ້ເຫັນຜົນງານທີ່ຍາດມາໄດ້ໃນໄລຍະ 1 ປີຜ່ານມາ, ດ້ານດີ-ດ້ານອ່ອນ ແລະ ຂໍ້ຄົງຄ້າງ ໃນການເຄື່ອນໄຫວຈັັດຕັ້ງປະຕິບັດວຽກງານ ທີ່ຂະແໜງພາຍໃນແຂວງໄຊຍະບູລີ ຈະຕ້ອງໄດ້ພ້ອມກັນສືບຕໍ່ປັບປຸງແກ້ໄຂ ໄດ້ຮັບຜົນດີໃນຕໍ່ໜ້າ ແລະ ສູ້ຊົນຈັດຕັ້ງຜັນຂະຫຍາຍບັນດາຄາດໝາຍທີ່ກໍານົດໄວ້ ໃນແຜນການປີ 2020 ໃຫ້ບັນລຸຜົນສໍາເລັດ. ນອກນັ້ນກອງປະຊຸມຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຄຸ້ມຄອງພະນັກງານ-ການບໍາລຸງກໍ່ສ້າງພະນັກງານ, ວຽກງານການຢັ້ງຢືນການເກີດຂອງເດັກ, ວຽກງານຊົນເຜົ່າ ແລະສາດສະໜາ, ວຽກງານຄຸ້ມຄອງການຍົກຍ້າຍເຂົ້າ-ອອກຂອງພົນລະເມືອງ, ການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະພັດທະນາ ຕິດພັນກັບວຽກງານ 3 ສ້າງ, ວຽກງານການຈົດທະບຽນຄອບຄົວ, ການຈັດຕັ້ງປະຕິບັດກົນໄກບໍລິການຜ່ານປະຕູດຽວ, ວຽກງານການປັບປຸງກົງຈັກ ແລະການຂຽນກໍານົດຕໍາແໜ່ງງານ.

ພ້ອມກັນນີ້ ກອງປະຊຸມ ຍັງໄດ້ຈັດໃຫ້ມີພິທີປະດັບຫຼຽນໄຊ ແລະ ມອບໃບຍ້ອງຍໍໃຫ້ແກ່ບຸກຄົນ ແລະ ກົມກອງລວມໝູ່ ທີ່ມີຜົນງານດີເດັ່ນປະກອບສ່ວນເຂົ້າໃນວຽກງານຂະແໜງການພາຍໃນໄລຍະ 5 ປີ ຜ່ານມາ ເຊິ່ງປະກອບມີຫຼຽນໄຊແຮງງານ ຊັ້ນ III ຈໍານວນ 06 ທ່ານ, ຫຼຽນກາແຮງງານ ຈໍານວນ 04 ທ່ານ ແລະ 01 ກົມກອງ, ໃບຍ້ອງຍໍລັດຖະບານ, ໃບຍ້ອງຍໍລັດຖະມົນຕີກະຊວງພາຍໃນ ແລະ ໃບຍ້ອງຍໍຂັ້ນພະແນກພາຍໃນ ອີກຈໍານວນໜຶ່ງ. ໃນຕອນທ້າຍກອງປະຊຸມ ທ່ານ ຄໍາໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ໂອ້ລົມຕໍ່ກອງປະຊຸມ ໂດຍທ່ານໄດ້ຮຽກຮ້ອງໃຫ້ພະແນກພາຍໃນ ເອົາໃຈໃສ່ໃນການຄົ້ນຄ້ວາປັບປຸງກົງຈັກການຈັດຕັ້ງແຕ່ລະຂັ້ນ ຢ່າງມີຄວາມເປັນເອກະພາບ, ຈະແຈ້ງ ແລະ ມີວິທະຍາສາດ ໂດຍເອົາໃຈໃສ່ໃນການວິເຄາະງານ ຫຼື ໜ້າວຽກຢູ່ແຕ່ລະກົງຈັກຢ່າງລະອຽດ ກ່ອນມີການກໍານົດເປັນແຕ່ລະຕໍາແໜ່ງງານ, ເອົາໃຈໃສ່ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດທິດນໍາ 3 ສ້າງ ໂດຍສະເພາະບັນດາບ້ານທີ່ໄດ້ກໍານົດເປັນບ້ານປະຕິບັດ 3 ສ້າງ ແລະ ໃຫ້ສົມທົບກັບບັນດາເມືອງກວດກາປະເມີນຜົນຄືນວຽກງານ 3 ສ້າງ ພ້ອມທັງຜັນຂະຫຍາຍໄຍັງບັນດາບ້ານທີ່ມີເງື່ອນໄຂໃນການຈັດຕັ້ງປະຕິບັດໃຫ້ໄດ້ທັ້ງປະລິມານ ແລະ ຄຸນນະພາບ.

Hits: 0

Leave a Reply

Your email address will not be published. Required fields are marked *