ກະຊວງພາຍໃນ

Ministry of Home Affairs

ກອງປະຊຸມເຜີຍແຜ່ແນະນໍາກ່ຽວກັບການປະເມີນຜົນ “ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ແລະ ວຽກງານຮັກຊາດພັດທະນາ” ແຂວງຈຳປາສັກ.

ໃນຕອນເຊົ້າວັນທີ 09 ມີນາ 2020, ກະຊວງພາຍໃນ ຢູ່ຫ້ອງປະຊຸມປົກຄອງ ແຂວງຈໍາປາສັກ ຮ່ວມກັບພະແນກພາຍໃນແຂວງຈຳປາສັກ ຈັດກອງປະຊຸມເຜີຍແຜ່ແນະນໍາເອກະສານກ່ຽວກັບການຈັດຕັ້ງປະຕິບັດວຽກງານ 3 ສ້າງ ແລະ ວຽກງານແຂ່ງຂັນຮັກຊາດພັດທະນາ ໂດຍໃຫ້ກຽດເປັນປະທານ ຂອງ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ, ມີຫົວໜ້າພະແນກ-ຮອງຫົວໜ້າພະແນກພາຍໃນ,​ ການນຳບັນດາພະແນກການ-ກົມກອງອ້ອມຂ້າງແຂວງການນຳ 09 ເມືອງ, 01 ນະຄອນ ແລະ ພະນັກງານວິຊາການທີ່ກ່ຽວຂ້ອງ ເຂົ້າຮ່ວມ.

ໃນກອງປະຊຸມຄັ້ງນີ້ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ໄດ້ໃຫ້ກຽດເຜີຍແຜ່ເອກະສານກ່ຽວກັບການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ, ວຽກງານຮັກຊາດ ແລະ ພັດທະນາ ແລະ ເຜີຍແຜ່ແບບຟອມການປະເມີນວຽກງານ 3 ສ້າງ ເພື່ອເປັນບ່ອນອີງໃນການກຳນົດຫຼັກການກົນໄກວີທີການຕ່າງໆຢ່າງລະອຽດຈະແຈ້ງ, ເປັນມາດຖານສຳຄັນໃນ ການຄົ້ນຄ້ວາສ້າງຄວາມເຂົ້າໃຈ ໃນການຈັດຕັ້ງປະຕິບັດວຽກງານຕົວຈິງ  ໃຫ້ມີຄວາມເປັນເອກະພາບກັນໃນ ຂອບເຂດທົ່ວປະເທດ ແລະ ເປັນບ່ອນອິງໃຫ້ແກ່ກະຊວງ, ອົງການຂັ້ນແຂວງ ແລະ ທ້ອງຖິ່ນ ໃນການປະເມີນຜົນວຽກງານ 3 ສ້າງ  ໃຫ້ມີຄວາມຖຶກຕ້ອງກັບສະພາບຄວາມເປັນຈິງ.

ໃນຕອນທ້າຍຂອງກອງປະຊຸມ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ໄດ້ໂອ້ລົມ ແລະ ເນັ້ນໃຫ້ການນຳແຕ່ລະພາກສ່ວນຕ້ອງເປັນເຈົ້າການໃນການຕິດຕາມ, ຊຸກຍູ້ ແລະ ຈັດຕັ້ງປະຕິບັດວຽກງານສາມສ້າງ, ຂະບວນການແຂ່ງຂັນຮັກຊາດ ແລະ ພັດທະນາ, ຕິດພັນກັບການຈັດຕັ້ງປະຕິບັດວຽກງານວິຊາສະເພາະໃນຂະແໜງການຂອງຕົນ ໃຫ້ມີຜົນສຳເລັດ,ເອົາໃຈໃສ່ໃນການເລືອກເຟັ້ນວຽກດີ, ຄົນເດັ່ນ ໂດຍຜ່ານຄະນະກຳມະການແຕ່ລະຂັ້ນ ແລະ ສະເໜີຍ້ອງຍໍໃຫ້ຖືກເປົ້າໝາຍ ຫຼີກລຽງການຍ້ອງຍໍບໍ່ຖືກເປົ້າໝາຍ, ເອົາໃຈໃສ່ຢ່າງເຂັ້ມງວດໃນການສະຫຼຸບຕີລາຄາ ແລະ ຖອດຖອນບົດຮຽນໃນການຈັດຕັ້ງປະຕິບັດວຽກງານດັ່ງກ່າວໃຫ້ຂະແໜງການສາຍຕັ້ງ ແລະ ກອງເລຂາວຽກງານສາມສ້າງ ກໍ່ຄືພະແນກພາຍໃນ ເປັນຜູ້ສັງລວມໃຫ້ທັນຕາມກຳນົດເວລາ.

Hits: 57

Leave a Reply

Your email address will not be published. Required fields are marked *