ກະຊວງພາຍໃນ

Ministry of Home Affairs

ແມ່ຍິງ ກະຊວງພາຍໃນ ຕີລາຄາການຈັດຕັ້ງປະຕິບັດວຽກງານໄລຍະຜ່ານມາ

ໃນຕອນເຊົ້າຂອງວັນທີ 06 ມີນາ 2020 ສະຫະພັນແມ່ຍິງ ກະຊວງພາຍໃນ ໄດ້ຈັດກອງປະຊຸມ-ສຳມະນາ ພາຍໃຕ້ຫົວຂໍ້ “ແຂ່ງຂັນປະຕິບັດ ວຽກງານສະຫະພັນແມ່ຍິງ ປີ 2020 ໃຫ້ປະກົດຜົນເປັນຈິງ” ໂດຍການເປັນປະທານຮ່ວມຂອງ ສະຫາຍ ນ. ທອງຈັນ ແກ້ວແສນຫອມ ຄະນະພັກກະຊວງ ຜູ້ຊີ້ນຳວຽກງານອົງການຈັດຕັ້ງສະຫະພັນແມ່ຍິງກະຊວງພາຍໃນ ແລະ ສະຫາຍ ນ. ຄຳພູນ ແກ້ວສະຫວັນ ກຳມະການສູນກາງສະຫະພັນແມ່ຍິງລາວ ປະທານສະຫະພັນແມ່ຍິງ ກະຊວງພາຍໃນ ມີ ບັນດາສະຫາຍ ຮອງປະທານ, ບັນດາສະຫາຍໃນຄະນະບໍລິຫານງານສະຫະພັນແມ່ຍິງ ກະຊວງພາຍໃນ ແລະ ບັນດາສະຫາຍເອື້ອຍນ້ອງສະມາຊິກແມ່ຍິງເຂົ້າຮ່ວມ.

                  ກອງປະຊຸມ-ສຳມະນາ ໃນຄັ້ງນີ້ ສະຫາຍ ນ. ທອງບາ ສັກສະເສີມສຸກ ຮອງປະທານສະຫະພັນແມ່ຍິງ ກະຊວງພາຍໃນ ໄດ້ຜ່ານຂໍ້ຕົກລົງຮັບຮອງ ແລະ ແຕ່ງຕັ້ງໜ່ວຍງານຕ່າງໆ ເພື່ອຮັບຜິດຊອບໃຫ້ແກ່ການເຄື່ອນໄຫວວຽກງານຂອງອົງການ
ຈັດຕັ້ງແມ່ຍິງກະຊວງພາຍໃນ ແລະ ຮັບຟັງການຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈຳປີ 2016-2019 ແລະ ແຜນການ 2020 ເຊິ່ງໃນບົດສະຫຼຸບດັ່ງກ່າວໄດ້ ສະຫຼຸບຕີລາຄາ ແລະ ປະເມີນຄືນຜົນຂອງການເຄື່ອນໄຫວຈັດຕັ້ງປະຕິບັດຂະບວນການແຂ່ງຂັນ 3 ດີ ຂອງສະຫະພັນແມ່ຍິງ ກະຊວງພາຍໃນ ໃນໄລຍະຜ່ານມາ ເຊິ່ງໄດ້ຍົກໃຫ້ເຫັນເຖິງ ການປະຕິບັດຕາມຂໍ້ແຂ່ງຂັນ 3 ດີ ຂອງ ແມ່ຍິງລາວ ເຊັ່ນ:  ພົນລະເມືອງດີ, ພັດທະນາດີ ແລະ ສ້າງຄອບຄົວດີ ທີ່ກຳນົດເປັນຈຸດໝາຍສູ້ຊົນໃນການພັດທະນາແມ່ຍິງກະຊວງພາຍໃນ ປີ 2016-2020 ກໍ່ຄືແຜນການເຄື່ອນໄຫວວຽກງານແມ່ຍິງປະຈຳແຕ່ລະປີໃນການພັດທະນາແມ່ຍິງ, ຄອບຄົວ ແລະ ສັງຄົມ ເພື່ອກໍ່ສ້າງສະມາຊິກເອື້ອຍນ້ອງແມ່ຍິງ ກະຊວງພາຍໃນ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ ໄດ້ຮັບການພັດທະນາທາງດ້ານຄວາມຮູ້, ຄວາມສາມາດ ແລະ ພັດທະນາອົງການຈັດຕັ້ງແມ່ຍິງ ໃຫ້ກາຍເປັນເສນາທິການທີ່ເຂັ້ມແຂງໃຫ້ຄະນະພັກແຕ່ລະຂັ້ນ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງແຕ່ລະໄລຍະ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.          

ໃນຕອນທ້າຍຂອງກອງປະຊຸມ-ສຳມະນາ ສະຫາຍ ນ. ທອງຈັນ ແກ້ວແສນຫອມ ຄະນະພັກກະຊວງ ຜູ້ຊີ້ນຳວຽກງານອົງການຈັດຕັ້ງສະຫະພັນແມ່ຍິງກະຊວງພາຍໃນ ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ໂດຍສະເພາະສະຫາຍ ໄດ້ເນັ້ນໃຫ້ ສະມາຊິກເອື້ອຍນ້ອງແມ່ຍິງທຸກສະຫາຍ ໃຫ້ມີຄວາມຫ້າວຫັນ ໃນການເຄື່ອນໄຫວ ປະຕິບັດໜ້າທີ່ວຽກງານ ແລະ ຝຶກຝົນຫຼໍ່ຫຼອມຕົນເອງໃຫ້ມີຄວາມກ້າວໜ້າຮອບດ້ານ ເຮັດໃຫ້ຂະບວນການ 03 ດີ ໄດ້ເປັນບ່ອນອີງເພື່ອສ້າງແບບແຜນວິທີເຮັດວຽກ ແລະ ສະຫຼຸບຕິລາຄາຜົນງານການເຄື່ອນໄຫວຂອງເອື້ອຍນ້ອງແມ່ຍິງ ໃນແຕ່ໄລຍະໃຫ້ມີຄວາມຊັດເຈນຂຶ້ນກວ່າເກົ່າ ເພື່ອແຂ່ງຂັນປະຕິບັດວຽກງານສະຫະພັນແມ່ຍິງ ປີ 2020  ໃຫ້ປະກົດຜົນເປັນຈິງ.

Hits: 22

Leave a Reply

Your email address will not be published. Required fields are marked *