ກະຊວງພາຍໃນ

Ministry of Home Affairs

ກອງປະຊຸມໃຫຍ່ຜູ້ແທນກໍາມະບານກະຊວງພາຍໃນ ຄັ້ງທີ II

ສະຫະພັນກຳມະບານ ກະຊວງພາຍໃນ ໄດ້ຈັດກອງປະຊຸມໃຫຍ່ຜູ້ແທນກໍາມະບານທົ່ວກະຊວງ ຄັ້ງທີ II ຂຶ້ນ ໃນວັນທີ 23 ມີນາ 2020  ພາຍໃຕ້ການເຂົ້າຮ່ວມຂອງ ສະຫາຍ ຄໍາໝັ້ນ ສູນວິເລີດ, ກໍາມະການສູນກາງພັກ, ລັດຖະມົນຕີກະຊວງພາຍໃນ ແລະ ທ່ານ ວັນນາ ດວງພະຈັນ ຮອງປະທານສູນກາງສະຫະພັນກຳມະບານລາວ, ມີຄະນະພັກກະຊວງ, ຄະນະບໍລິຫານງານສະຫະພັນກຳມະບານ, ຕາງໜ້າຄະນະບໍລິຫານງານຊາວໜຸ່ມ, ຕາງໜ້າຄະນະສະຫະພັນແມ່ຍິງກະຊວງ, ບັນດາຄະນະໜ່ວຍກຳມະບານ ແລະ ຜູ້ແທນສົມບູນກຳມະບານ ກະຊວງພາຍໃນ ເຂົ້າຮ່ວມ.

          ໃນກອງປະຊຸມ, ສະຫາຍ ສິງທະວອນ ດາລາວົງ, ກໍາມະການຄະນະບໍລິຫານງານສູນກາງສະຫະພັນກໍາມະບານລາວ, ປະທານສະຫະພັນກໍາມະບານກະຊວງພາຍໃນ ໄດ້ຂຶ້ນສະເໜີຜ່ານຮ່າງສະຫຼຸບລາຍງານການເມືອງ, ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ, ຄະນະບໍລິຫານງານສະຫະພັນກໍາມະບານກະຊວງ ຖືສໍາຄັນວຽກງານສຶກສາອົບຮົມການເມືອງແນວຄິດເປັນຫຼັກ ໂດຍມີການ ຈັດຕັ້ງເຜີຍແຜ່ເຊື່ອມຊຶມ ບັນດາມະຕິກອງປະຊຸມຄົບຄະນະບໍລິຫານງານສູນກາງສະຫະພັນກໍາມະບານສະໄໝທີVII, ກົດໝາຍ, ກົດລະບຽບຄໍາແນະນໍາທີ່ກ່ຽວຂ້ອງກັບວຽກງານກໍາມະບານ, ຈັດປາຖະກະຖາເລົ່າມູນເຊື້ອວັນກໍາມະກອນສາກົນ ວັນສ້າງຕັ້ງອົງການກໍາມະບານລາວຢ່າງເປັນປົກກະຕິ  ໂດຍສະເພາະແມ່ນການປັບປຸງຄະນະໜ່ວຍກໍາມະບານຮາກຖານ ໃຫ້ສອດຄ່ອງກັບກົດໝາຍ ແລະ ກົດລະບຽບ ຂອງສະຫະພັນກໍາມະບານ, ຢຶດໝັ້ນແບບແຜນການນໍາພາ ແລະ ວິທີເຮັດວຽກຕາມຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບພາຍໃນຄະນະຢ່າງຈະແຈ້ງ; ເປັນເຈົ້າການປຸກລະດົມ, ຊຸກຍູ້ບັນດາໜ່ວຍກໍາມະບານຮາກຖານ ແລະ ສະມາຊິກກໍາມະບານ ຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າ, ເຊິ່ງທິດທາງໃນຕໍ່ໜ້າ(2020-2025), ສືບຕໍ່ແຜນການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກກໍາມະບານ; ແຜນການປັບປຸງການຈັດຕັ້ງ, ການຂະຫຍາຍ ແລະ ພັດທະນາສະມາຊິກກໍາມະບານ ປັບປຸງຄະນະໜ່ວຍກໍາມະບານຮາກຖານໃຫ້ມີຄວາມເຂັ້ມແຂງ ໄປຕາມການປ່ຽນແປງຂອງອໍານາດການປົກຄອງ; ສືບຕໍ່ຂຶ້ນແຜນ ແລະ ປະສານສົມທົບ ກັບສູນກາງສະຫະພັນກໍາມະບານລາວ ຈັດຝຶກອົບຮົມ ໃຫ້ແກ່ຜູ້ຮັບຜິດຊອບວຽກງານກໍາມະບານແຕ່ລະປີ; ຈັດຝຶກອົບຮົມທິດສະດີການເມືອງ-ການປົກຄອງ ແລະ ສ້າງນັກປາຖະກະຖາ ແຕ່ລະຫົວຂໍ້ ແຕ່ລະປີ; ຊຸກຍູ້ບັນດາໜ່ວຍກໍາມະບານຮາກຖານ ຂຶ້ນແຜນ ແລະ ຄັດເລືອກສະມາຊິກ ເຂົ້າຮ່ວມຝຶກອົບຮົມ ແລະສອບເສັງ ເອົາທຶນໄປບໍາລຸງ ແລະ ຍົກລະດັບຄວາມຮູ້, ດ້ານວິຊາສະເພາະ ແລະ ພາສາຕ່າງປະເທດ.
­­­­

ໃນກອງປະຊຸມ, ຍັງໄດ້ປ່ອນບັດເລືອກເອົາຄະນະສະຫະພັນກຳມະບານກະຊວງ 15 ສະຫາຍ, ຊຶ່ງໄດ້ເລືອກເອົາ ສະຫາຍ ຕ໋ອງ ພູມມີພັນ ເປັນປະທານສະຫະພັນກໍາມາບານກະຊວງພາຍໃນ, ເລືອກເອົາສະຫາຍ ນາງ ຈັນທາ ອ່ອນໄຊວຽງ ເປັນຮອງປະທານ ແລະ ເລືອກເອົາ ສະຫາຍ ສຸລິວັນ ອ່ອນຕາວົງ ເປັນຮອງປະທານ  ທັງເປັນປະທານກວດກາກວດກາ.  ໂອກາດທີ່ມີຄວາມໝາຍສໍາຄັນນີ້ ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມຊີ້ທິດເຍືອງທາງ ຈາກ ທ່ານ ວັນນາ ດວງພະຈັນ ຮອງປະທານສູນກາງສະຫະພັນກຳມະບານລາວ  ເຊິ່ງທ່ານໄດ້ເນັ້ນໃຫ້ຄະນະບໍລິຫານງານສະຫະພັນກຳມະບານຊຸດໃໝ່ ເອົາ ໃຈໃສ່ວຽກງານສຶກສາອົບຮົມການເມືອງແນວຄິດຂອງສະມາຊິກກຳມະບານໃຫ້ຢ່າງເປັນປົກກະຕິ, ເປັນເຈົ້າການໃນການເຊື່ອມຊຶມແນວທາງນະໂຍບາຍຂອງພັກ-ລັດ, ຈັດຕັ້ງຂະບວນການແຂ່ງຂັນ 5 ເປັນເຈົ້າໃຫ້ສຳເລັດຜົນເປັນຢ່າງດີ ພ້ອມທັງເປັນເຈົ້າການໃນການປະຕິບັດວຽກງານວິຊາສະເພາະ ດ້ວຍຄວາມຮັບຜິດຊອບສູງ ແລະ ນໍາເອົາມະຕິກອງປະຊຸມໃຫຍ່ໃນຄັ້ງນີ້ ໄປເຜີຍແຜ່ ແລະ ຈັດຕັ້ງຜັນຂະຫຍາຍໃຫ້ຖືກຕ້ອງສອດຄ່ອງກັບແຕ່ລະຂົງເຂດຢ່າງມີປະສິດທິພາບ ແລະ ປະສິດທິຜົນ ເພື່ອເຮັດໃຫ້ອົງການຈັດຕັ້ງກຳມະບານ ນັບມື້ນັບເຂັ້ມແຂງຂຶ້ນ.

Hits: 0

Leave a Reply

Your email address will not be published. Required fields are marked *