ກະຊວງພາຍໃນ

Ministry of Home Affairs

ກະຊວງພາຍໃນ ຈັດພິທີປະກາດພະນັກງານການນຳ ພັກຜ່ອນຮັບອຸດໜູນບຳນານ

ກະຊວງພາຍໃນ ຈັດພິທີປະກາດພະນັກງານການນຳພັກຜ່ອນອຸດໜູນບຳນານຂອງກະຊວງພາຍໃນ ຂຶ້ນໃນ  ວັນທີ 25 ມີນາ 2020 ໂດຍການເຂົ້າຮ່ວມຂອງ ທ່ານ ຄຳໝັ້ນ ສູນວິເລີດ ກຳມະການສູນກາງພັກ ລັດຖະມົນຕີກະຊວງພາຍໃນ, ມີຄະນະພັກ, ຄະນະນຳ ກະຊວງ ແລະ ສະມາຊິກສົມບູນ ກະຊວງພາຍໃນເຂົ້າຮ່ວມ.

ການຈັດພິທີໃນຄັ້ງນີ້ ແມ່ນເພື່ອປະກາດພະນັກງານການນຳ ພັກຜ່ອນຮັບອຸດໜູນບຳນານຂອງ ກະຊວງພາຍໃນ ປີ 2020 ໃຫ້ແກ່ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ແມ່ນຜູ້ໜຶ່ງທີ່ມີຜົນງານອັນຫຼວງຫຼາຍໃນການປະກອບສ່ວນເຂົ້າໃນວຽກງານລວມຂອງກະຊວງພາຍໃນກໍ່ຄືປະເທດຊາດ ຈົນມາຮອດອາຍຸກະສຽນແມ່ນໄດ້ 64 ປີ; ອາຍຸການເຮັດວຽກແມ່ນ 42 ປີ ຖືວ່າຖືກຕ້ອງຕາມກົດໝາຍ ແລະ ລະບຽບການທີ່ວາງອອກ, ການຈັດພິທີດັ່ງກ່າວ ມີຄວາມໝາຍຄວາມສຳຄັນເປັນຢ່າງຍິ່ງ ເປັນການຢັ້ງຢືນເຖິງການປະຕິບັດກົດໝາຍ ແລະ ລະບຽບການ ໂດຍສະເພາະຕໍ່ຂົງເຂດວຽກງານຄຸ້ມຄອງພະນັກງານ ໃຫ້ມີຄວາມເຂັ້ມງວດ ແລະ ເປັນເອກະພາບ, ສຳລັບການພັກຜ່ອນຮັບອຸດໜູນບຳນານ ຖືວ່າເປັນກົດເກນ ແລະ ຫຼັກການໜຶ່ງໃນການຄຸ້ມຄອງພະນັກງານ ພ້ອມທັງປະຕິບັດນະໂຍບາຍຕໍ່ຜູ້ທີ່ມີຜົນງານ, ມີຄຸນງາມຄວາມດີຈາກການປະຕິບັດໜ້າທີ່ວຽກງານໃນໄລຍະຜ່ານມາ, ເມື່ອເຖິງອາຍຸກະສຽນແລ້ວຕ້ອງໄດ້ພັກຜ່ອນ ເພື່ອຮັກສາສຸຂະພາບຮ່າງກາຍ ແລະ ຈິດໃຈໃຫ້ແຂງແຮງ.

ໃນຕອນທ້າຍຂອງພິທີ ທ່ານ ຄຳໝັ້ນ ສູນວິເລີດ ກຳມະການສູນກາງພັກ ລັດຖະມົນຕີກະຊວງພາຍໃນ ໄດ້ໃຫ້ກຽດມີຄຳເຫັນໂອ້ລົມ ເຊິ່ງທ່ານ ໄດ້ຍ້ອງຍໍຊົມເຊີຍຕໍ່ຜົນສຳເລັດໃນຫຼາຍໆດ້ານທີ່ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ໄດ້ເອົາໃຈໃສ່ໃນການນຳພາ-ຊີ້ນຳ, ຄວາມເປັນເອກະພາບຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ຄວາມເປັນແບບຢ່າງທີ່ດີ, ມີຄວາມຮູ້-ຄວາມສາມາດ, ມີຫົວຄິດປະດິດສ້າງ, ມີຄວາມຮັບຜິດຊອບສູງ ແລະ ມີຄວາມສາມັກຄີຮັກແພງກັບບັນດາສະມາຊິກພັກ, ພະນັກງານ-ລັດຖະກອນທຸກຖວ້ນໜ້າ, ເປັນຜູ້ໜຶ່ງທີ່ໄດ້ຮັບຄວາມໄວ້ວາງໃຈຈາກການຈັດຕັ້ງ ພ້ອມທັງໄດ້ປະກອບສ່ວນເຮັດໃຫ້ການຈັດຕັ້ງມີຄວາມເຂັ້ມແຂງ ແລະ ພ້ອມດຽວກັນນັ້ນ ທ່ານ ຄຳໝັ້ນ ສູນວິເລີດ ກຳມະການສູນກາງພັກ ລັດຖະມົນຕີກະຊວງພາຍໃນ ຍັງຕາງໜ້າໃຫ້ພັກ ແລະ ລັດຖະບານ ກໍ່ຄື ກະຊວງພາຍໃນ ຂໍສະແດງຄວາມຂອບອົກຂອບໃຈຕໍ່ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ທີ່ປະກອບສ່ວນວຽກງານໃນໄລຍະຜ່ານມາ ແລະ ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນຊີວິດການປະຕິບັດໜ້າທີ່ວຽກງານໃນໄລຍະຜ່ານມາ. ນອກຈາກນັ້ນ ທ່ານຍັງໄດ້ຮຽກຮ້ອງໃຫ້ຄະນະພັກກະຊວງ, ຄະນະຫ້ອງການ,ກົມ, ສະຖານບັນ, ສູນ ແລະ ພະນັກງານ-ລັດຖະກອນ ຈົ່ງເສີມຂະຫຍາຍມູນເຊື້ອສາມັກຄີເປັນປຶກແຜ່ນ, ບຸກໜ້າບືນຕົວຜ່ານຜ່າອຸປະສັກຄວາມຫຍຸ້ງຍາກ, ເສີມຂະຫຍາຍຫົວຄິດປະດິດສ້າງ, ເປັນເຈົ້າການ ແລະ ສູ້ຊົນປະຕິບັດໜ້າທີ່ວຽກງານໃຫ້ມີຜົນສຳເລັດ ເພື່ອສ້າງຂະບວນການໃຫ້ແກ່ການກະກຽມດຳເນີນກອງປະຊຸມໃຫ່ຍ ຄັ້ງທີ II ຂອງອົງຄະນະພັກກະຊວງພາຍໃນ ແລະ ກອງປະຊຸມໃຫ່ຍຂອງໜ່ວຍພັກຮາກຖານຂອງຕົນໃຫ້ບັນລຸສຳເລັດຜົນເປັນຢ່າງດີ.

Hits: 0

Leave a Reply

Your email address will not be published. Required fields are marked *