ກະຊວງພາຍໃນ

Ministry of Home Affairs

ກະຊວງພາຍໃນ ປາຖະກະຖາເລົ່າມູນເຊື້ອວັນສ້າງຕັ້ງກຳມະບານລາວ ຄົບຮອບ 64 ປີ

ວັນທີ 31 ມັງກອນ 2020 ນີ້ ສະຫະພັນກໍາມະບານ ກະຊວງພາຍໃນ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງກຳມະບານລາວ ຄົບຮອບ 64 ປີ (01 ກຸມພາ 1956-01 ກຸມພາ 2020) ໂດຍການໃຫ້ກຽດປາຖະກະຖາເລົ່າມູນເຊື້ອວັນສຳຄັນດັ່ງກ່າວຂອງ ສະຫາຍ ສິງທະວອນ ດາລາວົງ ກໍາມະການຄະນະບໍລິຫານງານສູນກາງສະຫະພັນກຳມະບານລາວ, ປະທານສະຫະພັນກຳມະບານກະຊວງພາຍໃນ ມີບັນດາສະຫາຍໃນຄະນະບໍລິຫານງານ, ສະຫາຍຄະນະໜ່ວຍຮາກຖານ ແລະ ສະມາຊິກກຳມະບານ ເຂົ້າຮ່ວມ 200 ສະຫາຍ.

ໃນໂອກາດນີ້ ສະຫາຍ ສິງທະວອນ ດາລາວົງ ໄດ້ຍົກໃຫ້ເຫັນມູນເຊື້ອອັນພິລະອາດຫານຂອງກໍາມະບານ, ຄວາມໝາຍ, ຄວາມສຳຄັນ, ການເຕີບໃຫ່ຍຂະຫຍາຍຕົວຂອງສະຫະພັນກຳມະບານລາວ, ການປະກອບສ່ວນເຂົ້າໃນການປົກປັກຮັກສາ ແລະ ການສ້າງສາປະເທດຊາດ, ນໍ້າໃຈເສຍສະຫຼະອັນພິລະອາດຫານເຂົ້າໃນຂະບວນການຕໍ່ສູ້ປົດປ່ອຍປະເທດຊາດ, ການສຸມທຸກເຫື່ອແຮງ ແລະ ສະຕິປັນຍາເຂົ້າໃນພາລະກິດຂອງປະເທດຊາດທີ່ມອບໝາຍໃຫ້. ນອກນັ້ນ,  ປະທານສະຫະພັນກໍາມະບານ ກະຊວງພາຍໃນ ຍັງໄດ້ຍົກໃຫ້ເຫັນບາງຜົນງານທີ່ພົ້ນເດັ່ນໃນການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານສູນກາງສະຫະພັນກຳມະບານລາວ ຄັ້ງທີ 4 ສະໄໝທີ VII, ກອງປະຊຸມມ້ວນທ້າຍສະໄໝຄົບຄະນະບໍລິຫານງານສະຫະພັນກຳມະບານລາວ ຄັ້ງທີ 5 ສະໄໝທີ VII ແລະ ທິດທາງແຜນການໃນປິ 2020 ຕື່ມອີກ.

​ ພ້ອມດຽວກັນນີ້ ສະຫາຍ ສະຫາຍ ສິງທະວອນ ດາລາວົງ ກໍາມະການຄະນະບໍລິຫານງານສູນກາງສະຫະພັນກຳມະບານລາວ, ປະທານສະຫະພັນກຳມະບານກະຊວງພາຍໃນ ຍັງໄດ້ຮຽກຮ້ອງໃຫ້ ພະນັກງານ-ສະມາຊິກກຳມະບານທຸກສະຫາຍ ເພີ່ມທະວີເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ, ມີຄວາມສາມັກຄີຮັກແພງ ແລະ ຊ່ວຍເຫຼືອເຊິ່ງກັນ ແລະ ກັນ, ນຳເອົາເນື້ອໃນຂໍ້ແຂ່ງຂັນ 5 ເປັນເຈົ້າທີ່ສູນກາງສະຫະພັນກຳມະບານລາວ ວາງອອກ ນຳໄປຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານທີ່ຕົນຮັບຜິດຊອບ ໃຫ້ນັບມື້ນັບໄດ້ຮັບຜົນດີ.

Leave a Reply

Your email address will not be published. Required fields are marked *