ກະຊວງພາຍໃນ

Ministry of Home Affairs

ກອງປະຊຸມໃຫຍ່ ຂອງສະຫະພັນແມ່ຍິງກະຊວງພາຍໃນ ຄັ້ງທີ II

ກອງປະຊຸມໃຫຍ່ ຂອງສະຫະພັນແມ່ຍິງກະຊວງພາຍໃນ ຄັ້ງທີ II ໄດ້ຈັດຂຶ້ນໃນວັນທີ 29 ພະຈິກ 2019 ໂດຍການເປັນປະທານຂອງທ່ານນາງ ຄໍາພູນ ແກ້ວສະຫວັນ ປະທານສະຫະພັນແມ່ຍິງກະຊວງພາຍໃນ, ໃຫ້ກຽດເຂົ້າຮ່ວມມີທ່ານ ຄໍາໝັ້ນ ສູນວິເລີດ ເລຂາຄະນະພັກກະຊວງ ລັດຖະມົນຕີກະຊວງພາຍໃນ ແລະ ທ່ານ ດຣ ນ. ອິນລາວັນ ແກ້ວບຸນພັນ ກໍາມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີຄະນະພັກກະຊວງ, ຕາງໜ້າອົງການມະຫາຊົນກະຊວງ, ຄະນະບໍລິຫານງານສະຫະພັນແມ່ຍິງກະຊວງ, ແຂກຖືກເຊີນ ພ້ອມດ້ວຍສະມາຊິກແມ່ຍິງກະຊວງພາຍໃນເຂົ້າຮ່ວມ.

          ທ່ານນາງ ຄໍາພູນ ແກ້ວສະຫວັນ ປະທານສະຫະພັນແມ່ຍິງກະຊວງພາຍໃນ ໄດ້ຜ່ານຮ່າງບົດລາຍງານການເມືອງຕໍ່ກອງປະຊຸມ ໂດຍໄດ້ຍົກໃຫ້ເຫັນເຖິງຜົນງານການເຄື່ອນໄຫວວຽກງານທີ່ພົ້ນເດັ່ນໃນ 05 ປີຜ່ານມາ ເປັນຕົ້ນແມ່ນ ການຖືເອົາວຽກງານສຶກສາອົບຮົມການເມືອງແນວຄິດເປັນວຽກສໍາຄັນ ແລະ ຕົ້ນຕໍ ເພື່ອໃຫ້ສະມາຊິກສະຫະພັນແມ່ຍິງທຸກຄົນ, ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການຊີ້ນໍານໍາພາຂອງພັກ ຂອງການຈັດຕັ້ງທຸກຂັ້ນ, ເອົາໃຈໃສ່ປັບປຸງວຽກງານການຈັດຕັ້ງສະຫະພັນແມ່ຍິງໃຫ້ໜັກແໜ້ນເຂັ້ມແຂງ, ພ້ອມດຽວກັນນີ້ ຄະນະພັກ ແລະ ຄະນະສະຫະພັນແມ່ຍິງ ຍັງໄດ້ສຸມໃສ່ວຽກງານກໍ່ສ້າງພະນັກງານເພດຍິງ ໂດຍໄດ້ຊຸກຍູ້ສົ່ງເສີມໃຫ້ສະມາຊິກສະຫະພັນແມ່ຍິງ ໃຫ້ພັດທະນາຕົນເອງທັງ 4 ດ້ານ ເພື່ອຍົກລະດັບຄວາມຮູ້ຄວາມສາມາດຂອງຕົນໃຫ້ມີຄວາມຮູ້ ຄວາມສາມາດຮອບດ້ານຕິດພັນກັບວຽກງານວິຊາສະເພາະ ສາມາດບັນຈຸເຂົ້າໃນຕໍາແໜ່ງນໍາພາ-ຄຸ້ມຄອງຕັດສິນບັນຫາໄດ້. ນອກຈາກນີ້ ຄະນະສະຫະພັນແມ່ຍິງແຕ່ລະຂັ້ນ ກໍໄດ້ເອົາໃຈໃສ່ສຶກສາອົບຮົມ ແລະ ປຸກລະດົມສະມາຊິກໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ໂດຍການນໍາເອົາເນື້ອໃນຂໍ້ແຂ່ງຂັນ 3 ດີ ເຂົ້າໃນການປະຕິບັດວຽກວິຊາສະເພາະຂອງຕົນ, ສ້າງແຜນການຈັດຕັ້ງປະຕິບັດຂໍ້ແຂ່ງຂັນໃນບັນດາໜ່ວຍແມ່ຍິງອ້ອມຂ້າງ ເພື່ອເຮັດໃຫ້ການຈັດຕັ້ງປະຕິບັດເປັນຂະບວນຟົດຟື້ນ ກວ້າງຂວາງ ແລະ ຕິດພັນກັບຂະບວນຮັກຊາດ ແລະ ພັດທະນາ ເຊິ່ງສະແດງອອກໃນການສະຫຼຸບການແຂ່ງຂັນວຽກງານ 3 ດີໃນປີ 2015-2019 ສາມາດຄັດເລືອກບຸກຄົນ 3 ດີປະເພດ 1 ໄດ້ 155 ຄົນ, ປະເພດ 2 ໄດ້ 22 ຄົນ ແລະ ໜ່ວຍ 3 ດີ ປະເພດ 1 ໄດ້ 15 ໜ່ວຍ.

          ໃນວາລະກອງປະຊຸມ ໄດ້ມີການປ່ອນບັດຄັດເລືອກ ເອົາຄະນະບໍລິຫານງານສະຫະພັນແມ່ຍິງກະຊວງພາຍໃນ ຊຸດໃໝ່ ຈໍານວນ 9  ທ່ານ ແລະ ເລືອກໄດ້ ສະຫາຍນາງ ຄຳພູນ ແກ້ວສະຫວັນ ເປັນປະທານ, ສະຫາຍ ນາງ ຄຳສະຫງຽ່ມ ລາດຊະພົງ ເປັນຮອງປະທານ ແລະ ສະຫາຍນາງ ທອງບາ ສັກກະເສີມສຸກ ເປັນຮອງປະທານ ແລະ ທັງເປັນປະທານກວດກາ.

          ໂອກາດທີ່ມີຄວາມໝາຍສໍາຄັນນີ້ ຜູ້ເຂົ້າຮ່ວມກອງປະຊຸມຍັງໄດ້ຮັບຟັງຄໍາເຫັນໂອ້ລົມຈາກທ່ານ ຄໍາໝັ້ນ ສູນວິເລີດ ແລະ ທ່ານນາງ ອິນລາວັນ ແກ້ວບຸນພັນ ເຊິ່ງທ່ານໄດ້ເນັ້ນໃຫ້ຄະນະບໍລິຫານງານສະຫະພັນແມ່ຍິງຊຸດໃໝ່ ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ເອື້ອຍແມ່ຍິງຢ່າງເປັນປົກກະຕິ, ເປັນເຈົ້າການໃນການເຊື່ອມຊຶມແນວທາງນະໂຍບາຍຂອງພັກ-ລັດ, ຮັກສາໄດ້ 5 ຄຸນລັກສະນະທີ່ເປັນມູນເຊື້ອຂອງແມ່ຍິງລາວ, ປັບປຸງແບບແຜນວິທີເຮັດວຽກ ວິທີນໍາພາ ໃຫ້ສອດຄ່ອງກັບວຽກງານຕົວຈິງ, ຖືເອົາການປະຕິບັດຂໍ້ແຂ່ງຂັນ 3 ດີ ຕິດແໜ້ນກັບຂະບວນການເຄື່ອນໄຫວວຽກງານດ້ານວິຊາສະເພາະຂອງບັນດາສະຫາຍ ແລະ ຕິດພັນກັບໜ້າທີ່ການເມືອງທີ່ຄະນະພັກ-ຄະນະນໍາກະຊວງພາຍໃນມອບ  ໝາຍໃຫ້, ສືບຕໍ່ເສີມຂະຫຍາຍມູນເຊື້ອຄວາມສາມັກຄີຮັກແພງ ບົນພື້ນຖານຄວາມຈິງໃຈ ຊ່ວຍເຫຼືອເຊິ່ງກັນ ແລະ ກັນ  ພ້ອມທັງເປັນເຈົ້າການໃນການປະຕິບັດວຽກງານວິຊາສະເພາະ ດ້ວຍຄວາມຮັບຜິດຊອບສູງ ແລະ ນໍາເອົາມະຕິກອງປະຊຸມໃຫຍ່ໃນຄັ້ງນີ້ ໄປເຜີຍແຜ່ ແລະ ຈັດຕັ້ງຜັນຂະຫຍາຍໃຫ້ຖືກຕ້ອງສອດຄ່ອງກັບແຕ່ລະຂົງເຂດຢ່າງມີປະສິດທິພາບ ແລະ ປະສິດທິຜົນ.

Leave a Reply

Your email address will not be published. Required fields are marked *