ກະຊວງພາຍໃນ

Ministry of Home Affairs

ກອງປະຊຸມໃຫຍ່ຜູ້ແທນຊາວໜຸ່ມ ກະຊວງພາຍໃນ ຄັ້ງທີ II

ກອງປະຊຸມໃຫຍ່ຜູ້ແທນຊາວໜຸ່ມ ກະຊວງພາຍໃນ ຄັ້ງທີ II ໄດ້ຈັດຂຶ້ນໃນວັນທີ 22 ພະຈິກ 2019 ທີ່ຫ້ອງປະຊຸມໃຫຍ່ກະຊວງພາຍໃນ ໂດຍການໃຫ້ກຽດເຂົ້າຮ່ວມຂອງສະຫາຍ ຄໍາໜັ້ນ ສູນວິເລີດ ກໍາມະການສູນກາງພັກ ເລຂາຄະນະພັກ-ລັດຖະມົນຕີກະຊວງພາຍໃນ, ສະຫາຍ ນາງ ວິໄລວອນ ພັນທະວົງ ຮອງເລຂາຄະນະບໍລິຫານງານສູນກາງ ຊປປລ ແລະ ສະຫາຍ ວັນນະ ບຸບຜາ ກໍາມະການຄະນະບໍລິຫານງານສູນກາງ ຊປປລ ເລຂາຄະນະບໍລິຫານງານ ຊປປລ ກະຊວງພາຍໃນ, ມີຄະນະພັກ-ຄະນະນໍາກະຊວງ, ຕາງໜ້າອົງການຈັດຕັ້ງມະຫາຊົນ, ບັນດາສະຫາຍໃນຄະນະບໍລິຫານງານ ຊປປລ ກະຊວງ, ຜູ້ແທນສົມບູນຊາວໜຸ່ມທົ່ວກະຊວງພາຍໃນ ເຂົ້າຮ່ວມ.

          ກອງປະຊຸມໃນຄັ້ງນີ້ ຜູ້ເຂົ້າຮ່ວມໄດ້ຮັບຟັງການຜ່ານບົດລາຍງານການເມືອງການຈັດຕັ້ງປະຕິບັດວຽກງານຜ່ານມາ ແລະ ທິດທາງແຜນການໃນຕໍ່ໜ້າ ຈາກ ສະຫາຍ ວັນນະ ບຸບຜາ ກໍາມະການຄະນະບໍລິຫານງານສູນກາງ ຊປປລ ເລຂາຄະນະບໍລິຫານງານ ຊປປລ ກະຊວງພາຍໃນ ເຊິ່ງໄດ້ຍົກໃຫ້ເຫັນ ໃນໄລຍະ 5 ປີຜ່ານມາ ຄະນະບໍລິຫານງານ ຊປປລ ກະຊວງພາຍໃນ ໄດ້ເຕີບໃຫຍ່ຂະຫຍາຍຕົວທາງດ້ານການຈັດຕັ້ງ, ເປັນໃຈກາງເຕົ້າໂຮມ, ຄຸ້ມຄອງ ແລະ ສຶກສາອົບຮົມສະມາຊິກຊາວໜຸ່ມທົ່ວກະຊວງພາຍໃນ, ປັບປຸງການຈັດຕັ້ງໃຫ້ມີຄວາມກະທັດຮັດ, ໂປ່ງໃສ, ເຂັ້ມແຂງ, ໜັກ ແໜ້ນ ແລະ ສອດຄ່ອງກັບສະພາບຄວາມເປັນຈິງ, ເອົາໃຈໃສ່ປະຕິບັດພາລະບົດບາດ, ສິດໜ້າທີ່, ປັບປຸງແບບແຜນວິທີການນໍາພາ, ວິທີເຮັດວຽກໃຫ້ສອດຄ່ອງກັບການເຕີບໃຫຍ່ ແລະ ຂະຫຍາຍຕົວທາງດ້ານເສດຖະກິດ-ສັງຄົມ. ນອກຈາກນີ້, ຄະນະບໍລິຫານງານ ຊປປລ ກະຊວງພາຍໃນ ພ້ອມດ້ວຍຄະນະໜ່ວຍຮາກຖານ ຍັງໄດ້ເອົາໃຈໃສ່ຕິດຕາມແລະ ຊຸກຍູ້ສະມາຊິກຊາວໜຸ່ມຜູ້ທີ່ຫ້າວຫັນ, ມີຫຼັກໝັ້ນການເມືອງໜັກແໜ້ນ, ເປັນແບບຢ່າງໃນການເຄື່ອນໄຫວວຽກງານ, ມີຄຸນສົມບັດດີ ເພື່ອກໍ່ສ້າງສະມາຊິກຊາວໜຸ່ມທີ່ຢູ່ໃນເປົ້າໝາຍເຂົ້າເປັນສະມາຊິກພັກ ແລະ ຍັງເປັນເຈົ້າການປຸກລະດົມຊຸກຍູ້ ແລະ ຈັດຕັ້ງນໍາພາສະມາຊິກຊາວໜຸ່ມພາຍໃນກະຊວງເອົາໃຈໃສ່ປະກອບສ່ວນຢ່າງຕັ້ງໜ້າເຂົ້າຮ່ວມຂະບວນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຊຶ່ງສາມາດຮັບຮອງຊາວໜຸ່ມ 4 ບຸກໃນປີ 2017 ບັນລຸໄດ້ 91,5%, ປີ 2018 ບັນລຸໄດ້ 94,7% ແລະ ສໍາເລັດການມອບໃບຢັ້ງຢືນ ໜ່ວຍ 4 ບຸກໃຫ້ 15 ໜ່ວຍຊາວໜຸ່ມຮາກຖານທີ່ຂຶ້ນກັບ ຄະນະບໍລິຫານງານ ຊປປລ ກະຊວງພາຍໃນ.

ໃນໂອກາດເຂົ້າຮ່ວມກອງປະຊຸມ ສະຫາຍ ຄໍາໜັ້ນ ສູນວິເລີດ ກໍາມະການສູນກາງພັກ ເລຂາຄະນະພັກ-ລັດຖະ ມົນຕີກະຊວງພາຍໃນ ໄດ້ຊີ້ນໍາໃຫ້ຄະນະບໍລິຫານງານຊາວໜຸ່ມກະຊວງພາຍໃນ ຊຸດທີ II ຕັ້ງໜ້າສຶກສາອົບຮົມການ ເມືອງແນວຄິດສະມາຊິກຊາວໜຸ່ມໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິີນທໍາປະຕິວັດ, ມີນໍ້າໃຈຮັກຊາດ ຮັກລະບອບປະຊາທິປະໄຕປະຊາຊົນ, ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຊາດ, ມີຄວາມເຊື່ອໝັ້ນຕໍ່ອຸດົມການ ແລະ ເສັ້ນທາງກ້າວຂຶ້ນສັງຄົມນິຍົມຂອງປະເທດຊາດ, ເປັນເຈົ້າການເຕົ້າໂຮມຄວາມສາມັກຄີ, ປຸກລະດົມສະມາຊິກຊາວໜຸ່ມໃຫ້ເປັນກໍາລັງແຮງທີ່ຫ້າວຫັນ, ຈົ່ງຮັກພັກດີ ແລະ ກຽມພ້ອມປະເຊີນໜ້າກັບອຸປະສັກ ແລະ ຄວາມຫຍຸ້ງຍາກນາໆປະການ, ຄະນະບໍລິຫານງານຊາວໜຸ່ມ ແລະ ຄະນະໜ່ວຍຮາກຖານ ຕ້ອງໄດ້ເອົາໃຈໃສ່ປັບປຸງການຈັດຕັ້ງຂອງຕົນໃຫ້ມີຄວາມປອດໃສເຂັ້ມແຂງ, ໜັກແໜ້ນທາງດ້ານປະລິມານ ແລະ ຄຸນນະພາບ, ອອກແຮງແຂ່ງຂັນສ້າງຂະບວນການແຂ່ງຂັນ 4 ບຸກ ຂອງຊາວໜຸ່ມໃຫ້ມີຄວາມຟົດຟື້ນ, ຕິດພັນກັບຂະບວນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຂະບວນການແຂ່ງຂັນ ຮັກຊາດ ແລະ ພັດທະນາ ຕ້ອງສ້າງຖັນແຖວຊາວໜຸ່ມ ມີການແຂ່ງຂັນດ້ານການຝຶກຝົນຫຼໍ່ຫຼອມ, ແຂ່ງຂັນກັນຈັດຕັ້ງປະຕິບັດວຽກງານໃຫ້ດີ, ໃຫ້ໄວ ແລະ ມີປະສິດທິຜົນສູງ, ມີຄວາມຄິດປະດິດສ້າງໃໝ່ ໃນການພັດທະນາອົງກອນ. ໃນຕໍ່ໜ້າ, ໃນຖານະຄະນະຊາວໜຸ່ມກະຊວງພາຍໃນ ໃຫ້ຄົ້ນຄວ້າ, ວາງແຜນ ແລະ ກໍານົດເປົ້າໝາຍສະມາຊິກຊາວໜຸ່ມຜູ້ດີເດັ່ນ, ມີຄວາມຫ້າວຫັນ ເພື່ອຄັດເລືອກ ແລະ ຫັນລົງໄປຝຶກຝົນຫຼໍ່ຫຼອມ ແລະ ຊ່ວຍສ້າງຄວາມເຂັ້ມແຂງວຽກງານຂະແໜງພາຍໃນຢູ່ທ້ອງຖິ່ນຮາກຖານ. ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ຮັບຟັງການໂອ້ລົມຂອງສະຫາຍ ນາງ ວິໄລວອນ ພັນທະວົງ ຮອງເລຂາຄະນະບໍລິຫານງານສູນກາງ ຊປປລ ໂດຍສະຫາຍໄດ້ເນັ້ນໜັກໃຫ້ຄະນະບໍລິຫານງານ ຊປປລ ກະຊວງພາຍໃນ ຊຸດໃໝ່ ຕ້ອງເປັນແບບຢ່າງນໍາໜ້າ, ເປັນໃຈກາງໃນການເຕົ້າໂຮມຄວາມສາມັກຄີ, ເອົາໃຈໃສ່ສຶກສາອົບຮົມວຽກງານແນວຄິດການເມືອງ ໃຫ້ແກ່ສະມາຊິກຊາວໜຸ່ມ ດ້ວຍວິທີການທີ່ເໝາະສົມ ແລະ ສອດຄ່ອງກັບສະພາບຈຸດພິເສດຂອງຕົນ ແນ່ໃສ່ສ້າງແນວຄິດຮັກຊາດ, ຮັກບ້ານເກີດເມືອງນອນ, ເຊື່ອໝັ້ນຕໍ່ການນໍາພາຂອງພັກ, ດໍາລົງຊີວິດແບບລຽບງ່າຍ, ບໍ່ຟູມເຟືອຍ ແລະ ເອົາໃຈໃສ່ປັບປຸງຄະນະໜ່ວຍຂອງຕົນໃຫ້ມີຄວາມໜັກແໜ້ນເຂັ້ມແຂງ, ມີຄວາມສາມາດນໍາພາຂະບວນການຕົວຈິງຂອງຊາວໜຸ່ມ ໃຫ້ມີລັກສະນະຟົດຟື້ນຕໍ່ເນື່ອງ ແລະ ເປັນຂະບວນກວ້າງຂວາງກວ່າເກົ່າ.

Leave a Reply

Your email address will not be published. Required fields are marked *