ກະຊວງພາຍໃນ

Ministry of Home Affairs

ພິທີມອບ – ຮັບ ໂຄງການກໍ່ສ້າງອາຄານຫຼັງໃໝ່ ຂອງກະຊວງພາຍໃນ

ກະຊວງພາຍໃນ ຈັດພິທີ ມອບ-ຮັບ ອາຄານຫຼັງໃໝ່ ຂຶ້ນໃນວັນທີ 28 ຕຸລາ 2019 ນີ້ ໂດຍການໃຫ້ກຽດເຊັນ ບົດບັນທຶກມອບ-ຮັບອາຄານຫຼັງໃໝ່ ລະຫວ່າງ ທ່ານ ນາງ ສຸດສະດີ ລືໄຊ ປະທານບໍລິສັດວິສາຫະກິດສ່ວນບຸກຄົນ ລືໄຊ ກໍ່ສ້າງ(ເປັນຜູ້ກ່າວມອບ) ແລະ ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ ຫົວໜ້າຄະນະຮັບຜິດຊອບໂຄງການກໍ່ສ້າງ(ເປັນຜູ້ກ່າວຮັບ) ໂດຍການເຂົ້າຮ່ວມເປັນສັກຂີພິຍານຂອງ ທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ລັດຖະມົນຕີກະຊວງພາຍໃນ ມີບັນດາທ່ານຮອງລັດຖະມົນຕີ, ປະທານບໍລິສັດ ບົວຄໍາ ສໍາຫຼວດ-ອອກແບບ ແລະ ທີ່ປຶກສາ, ບັນດາຄະນະຫ້ອງການ, ບັນດາຄະນະກົມ ສະຖາບັນ ແລະ ສູນ ພ້ອມດ້ວຍພະນັກງານ-ວິຊາການ ທີ່ກ່ຽວຂ້ອງ ຂອງທັງສອງຝ່າຍ ເຂົ້າຮ່ວມ.

          ທ່ານ ຄໍາມູນ ວິພົງໄຊ ໄດ້ກ່າວວ່າ: ອາຄານສໍານັກງານຫຼັງໃໝ່ຂອງກະຊວງພາຍໃນ ນີ້ ເປັນສັນຍາລັກແຫ່ງການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ຂອງວຽກງານຂະແໜງພາຍໃນ ໂດຍໄດ້ສະແດງໃຫ້ເຫັນເຖິງຄວາມເປັນຫ່ວງເປັນໄຍ, ຄວາມເອົາໃຈໃສ່ໃນການຊີ້ນໍາ-ນໍາພາຢ່າງໃກ້ຊິດຕິດແທດຂອງພັກ ແລະ ລັດຖະບານ ໃນການສືບຕໍ່ປັບປຸງກໍ່ສ້າງພື້ນຖານໂຄງລ່າງອັນຈໍາເປັນ ເພື່ອສ້າງຄວາມເຂັ້ມແຂງໃຫ້ແກ່ຄະນະພັກ-ຄະນະນໍາ ຕະຫຼອດຮອດພະນັກງານ-ລັດຖະກອນ ຂະແໜງພາຍໃນ ທົ່ວປະເທດ. ພ້ອມກັນນີ້, ຄະນະພັກ-ຄະນະນໍາ, ບັນດາກົມ, ຫ້ອງການ, ສະຖາບັນ, ສູນ ແລະ ພະນັກງານ-ລັດຖະກອນທຸກຄົນ ຕ້ອງໄດ້ພ້ອມກັນຍົກສູງຄວາມຮັບຜິດຊອບ ໃນການປົກປັກຮັກສາ ແລະ ນໍາໃຊ້ອາຄານຫຼັງໃໝ່ນີ້ໃຫ້ດີທີ່ສຸດ, ໃຫ້ຖືວ່າເປັນບ້ານເຮືອນຂອງພະນັກງານ-ລັດຖະກອນ ທຸກຄົນມີພັນທະໃນການປົກປັກຮັກສາຄວາມສະຫງົບ, ຄວາມປອດໄພ, ອານາໄມ, ຮູ້ປະຢັດນໍ້າ-ໄຟ ຕາມລະບຽບການຄຸ້ມຄອງນໍາໃຊ້ອາຄານສະຖານທີ່ເຮັດວຽກໃຫ້ດີ ແລະ ນໍາໃຊ້ໄດ້ຍາວນານ.           ໂຄງການກໍ່ສ້າງອາຄານຫຼັງໃໝ່ ກະຊວງພາຍໃນ ເລີ່ມລົງມືກໍ່ສ້າງມາແຕ່ທ້າຍປີ 2017 ຮອດກາງປີ 2019 ການກໍ່ສ້າງຈຶ່ງສໍາເລັດ ອາຄານຫຼັງດັ່ງກ່າວເປັນອາຄານເບຕົງເສີມເຫຼັກ ປະກອບມີ 5 ຊັ້ນ, ຊັ້ນ 1 ຫາ ຊັ້ນ 4 ເປັນຫ້ອງເຮັດວຽກ ແລະ ຊັ້ນ 5 ເປັນຫ້ອງປະຊຸມ ມີລວງກວ້າງ 17 ແມັດ ແລະ ລວງຍາວ 41 ແມັດ ເຊິ່ງໄດ້ປະກອບເຟີນິເຈີຄົບ ຊຸດໃສ່ແຕ່ລະຫ້ອງ ໂດຍແມ່ນໂຄງການລົງທຶນ ແລະ ນໍາໃຊ້ງົບປະມານຂອງລັດຖະບານຮ້ອຍສ່ວນຮ້ອຍ ເຂົ້າໃນການກໍ່ສ້າງ ໃນມູນຄ່າທັງໝົດ 29.284.000.000 ກີບ.

Leave a Reply

Your email address will not be published. Required fields are marked *