ກະຊວງພາຍໃນ

Ministry of Home Affairs

ກະຊວງພາຍໃນ ມອບລົດຈັກໃຫ້ຫ້ອງການພາຍໃນ ເມືອງຮົ່ມ ແລະ ເມືອງບົວລະພາ ເພື່ອຮັບໃຊ້ວຽກງານຂະແໜງພາຍໃນ

ເພື່ອຊຸກຍູ້ການຈັດຕັ້ງປະຕິບັດວຽກງານເປັນເສນາທິການ ແລະ ບໍລິຫານຮັບໃຊ້ຄະນະນໍາ ຂະແໜງພາຍໃນ ເຮັດໃຫ້ວຽກງານມີປະສິດທິພາບ ແລະ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງປະຊາຊົນບັນດາເຜົ່າ ໃນທົ່ວສັງຄົມ ໃນລະຫວ່າງວັນທີ 14-18 ຕຸລາ 2019 ທ່ານ ສິງທະວອນ ດາລາວົງ ຫົວໜ້າຫ້ອງການ ກະຊວງພາຍໃນ ໄດ້ຕາງໜ້າໃຫ້ຄະນະພັກ-ຄະນະນໍາກະຊວງພາຍໃນ ລົງຊຸກຍູ້ ແລະ ຕິດຕາມການເຄື່ອນໄຫວຈັດຕັ້ງປະຕິບັດວຽກງານຂອງຫ້ອງການພາຍໃນເມືອງ ແລະ ໄດ້ມອບລົດຈັກ 01 ຄັນ ລວມມູນຄ່າ 12.150.000 ກີບ ໃຫ້ແກ່ຫ້ອງການພາຍໃນເມືອງຮົມ ແຂວງໄຊສົມບູນ ໂດຍການຮັບຂອງທ່ານ ໄພລໍ ຫົວໜ້າຫ້ອງການພາຍໃນເມືອງ ມີທ່ານ ບຸນເລີດລໍ ຮອງເຈົ້າເມືອງ ເມືອງຮົ່ມ ແລະ ທ່ານ ລາວຍ່າງ ຮອງຫົວໜ້າພະແນກພາຍໃນ ແຂວງໄຊສົມບູນ ພ້ອມດ້ວຍພະນັກງານຫ້ອງການພາຍໃນເມືອງເຂົ້າຮ່ວມ ແລະ ມອບລົດຈັກ 01 ຄັນ ພ້ອມດ້ວຍຄອມພິວເຕີ 01 ຊຸດ ລວມມູນຄ່າ 16.700.000 ກີບ ໃຫ້ແກ່ຫ້ອງການພາຍໃນເມືອງບົວລະພາ ແຂວງຄໍາມ່ວນ ໂດຍການຮັບຂອງທ່ານນາງ ແວວຄໍາ ຂຽວລີເດດ ຮອງຫົວໜ້າຫ້ອງການພາຍໃນເມືອງ ເມືອງບົວລະພາ ມີທ່ານ ປອ ແກ້ວອຸດອນ ບຸດສິງຄອນ ເຈົ້າເມືອງເມືອງບົວລະພາ ແລະ ທ່ານ ຄໍາສາ ສົມດາລາ ຫົວໜ້າຂະແໜງບໍລິຫານ-ຈັດຕັ້ງກວດກາ ພະແນກພາຍໃນແຂວງຄໍາມ່ວນ ພ້ອມດ້ວຍພະນັກງານຫ້ອງການພາຍໃນເມືອງເຂົ້າຮ່ວມ.

          ການມອບພາຫະນະໃຫ້ຫ້ອງການພາຍໃນເມືອງຮົມ ແຂວງໄຊສົມບູນ ແລະ ຫ້ອງການພາຍໃນເມືອງບົວລະພາ ແຂວງຄໍາມ່ວນ ໃນຄັ້ງນີ້ ກໍເພື່ອໃຫ້ນໍາໃຊ້ເຂົ້າໃນການເຄື່ອນໄຫວຈັດຕັ້ງປະຕິບັດວຽກງານຂະແໜງພາຍໃນ ໃຫ້ມີປະສິດທິພາບປະສິດທິຜົນ ແລະ ມີຄວາມເຂັ້ມແຂງ ເຮັດໃຫ້ສັງຄົມ ກໍ່ຄືປະຊາຊົນບັນດາເຜົ່າຮັບຮູ້ ແລະ ເຂົ້າໃຈພາລະບົດບາດ, ສິດ ແລະ ໜ້າທີ່ອັນແທ້ຈິງຂອງຫ້ອງການພາຍໃນເມືອງ ໃຫ້ນັບມື້ນັບກວ້າງຂວາງຂຶ້ນ.           ໃນໂອກາດນີ້ ທ່ານຫົວໜ້າຫ້ອງການພາຍໃນເມືອງທັງ 02 ກໍໄດ້ຜ່ານບົດລາຍງານການຈັດຕັ້ງປະຕິບັດວຽງານໃນໄລຍະຜ່ານມາໃຫ້ແກ່ ທ່ານ ສິງທະວອນ ດາລາວົງ ຫົວໜ້າຫ້ອງການ ກະຊວງພາຍໃນ ໄດ້ຮັບຊາບ ແລະ ໄດ້ກ່າວຄໍາຂອບໃຈຕໍ່ຄະນະພັກ-ຄະນະນໍາກະຊວງພາຍໃນ ທີ່ເຫັນໄດ້ຄວາມໝາຍຄວາມສໍາຄັນຂອງຫ້ອງການພາຍໃນເມືອງ ໃນການເຄື່ອນໄຫວຈັດຕັ້ງປະຕິບັດວຽກງານ ຕະຫຼອດໄລຍະຜ່ານມາ.

Leave a Reply

Your email address will not be published. Required fields are marked *