ກະຊວງພາຍໃນ

Ministry of Home Affairs

ກະຊວງພາຍໃນ ເປີດຂະບວນການຕ້ອນຮັບກອງປະຊຸມໃຫ່ຍ 3 ອົງການຈັດຕັ້ງມະຫາຊົນ, ໜ່ວຍພັກ ແລະ ກອງປະຊຸມໃຫ່ຍອົງຄະນະພັກ

ເພື່ອສ້າງຂະບວນການຂໍ່ານັບຮັບຕ້ອນ ກອງປະຊຸມໃຫ່ຍຄັ້ງທີ II ຂອງ ອົງຄະນະພັກກະຊວງ, ກອງປະຊຸມໃຫ່ຍບັນດາໜ່ວຍພັກຮາກຖານ, ແລະ ກອງປະຊຸມໃຫ່ຍຂອງ  3 ອົງການຈັດຕັ້ງມະຫາຊົນ ກະຊວງພາຍໃນ ໃນຕອນບ່າຍຂອງວັນທີ 16 ຕຸລາ 2019 ກະຊວງພາຍໃນ ໄດ້ຈັດພິທີເປີດຂະບວນການຂໍ່ານັບຮັບຕ້ອນກອງປະຊຸມໃຫ່ຍອົງຄະນະພັກ ແລະ ກອງປະຊຸມໃຫ່ຍ 3 ອົງການຈັດຕັ້ງມະຫາຊົນ ກະຊວງພາຍໃນ ຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ປອ ທອງຈັນ ມະນີໄຊ ຄະນະພັກກະຊວງ ຮອງລັດຖະມົນຕີກະຊວງພາຍໃນ, ມີບັນດາຄະນະພັກ, ຄະນະນຳກະຊວງ, ເລຂາໜ່ວຍພັກຮາກຖານ, ປະທານສະຫະພັນກຳມະບານ, ປະທານສະຫະພັນແມ່ຍິງ, ເລຂາຄະນະບໍລິຫານງານຊາວໜຸ່ມ, ສະມາຊິກພັກ, ສະມາຊິກອົງການຈັດຕັ້ງມະຫາຊົນ ແລະ ພະນັກງານ ກະຊວງພາຍໃນ ເຂົ້າຮ່ວມຢ່າງພ້ອມພຽງ.

          ທ່ານ ປອ ທອງຈັນ ມະນີໄຊ ຮອງລັດຖະມົນຕີກະຊວງພາຍໃນ ໄດ້ໃຫ້ກຽດກ່າວເປີດພິທີ ເຊິ່ງທ່ານໄດ້ເວົ້າເຖິງຄວາມໝາຍຄວາມສຳຄັນ ຂອງ ບັນດາກອງປະຊຸມຕ່າງໆທີ່ຕິດພັນກັບກອງປະຊຸມໃຫ່ຍຄັ້ງທີ II ຂອງອົງຄະນະພັກ ກະຊວງພາຍໃນ ທີ່ຈະໄດ້ຈັດຂຶ້ນໃນຕໍ່ໜ້າ ແລະ ຄາດໝາຍ, ເນື້ອໃນ ແລະ ຮູບການສ້າງຂະບວນການ ເປັນຕົ້ນແມ່ນ ການກະກຽມ ແລະ ດຳເນີນກອງປະຊຸມໃຫ່ຍດັ່ງກ່າວ ໃຫ້ສຳເລັດຕາມກຳນົດເວລາ ແລະ ມີຜົນສຳເລັດຕາມຄາດໝາຍທີ່ວາງໄວ້, ສອດຄ່ອງກັບກົດລະບຽບພັກ, ກົດລະບຽບອົງການຈັດຕັ້ງມະຫາຊົນ ທີ່ກຳນົດໄວ້, ການແຂ່ງຂັນ ແລະ ສ້າງຂະບວນການໂດຍຖືເອົາເນື້ອໃນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດພັນກັບຂະບວນການແຂ່ງຂັນ ຮັກຊາດ ແລະ ພັດທະນາ, ການຈັດຕັ້ງເຜີຍແຜ່ແນວທາງນະໂຍບາຍຂອງພັກ, ການເລົ່າມູນເຊື້ອການຊີ້ນຳ-ນຳພາ ຂອງພັກປະຊາຊົນປະຕິວັດລາວ ແລະ ວັນສຳຄັນຕ່າງໆ ຂອງພັກ, ຂອງຊາດ ໃຫ້ແກ່ພະນັກງານ-ລັດຖະກອນ ກະຊວງພາຍໃນ, ສ້າງຂະບວນການແຂ່ງຂັນກິລາ, ສິລະປະ-ວັນນະຄະດີ, ຂະບວນການອອກແຮງງານ.

 ທ່ານ ຍັງໄດ້ຮຽກຮ້ອງໃຫ້ຄະນະໜ່ວຍພັກຮາກຖານ, ຄະນະນຳແຕ່ລະໜ່ວຍການຈັດຕັ້ງ, ຄະນະບໍລິຫານງານຂອງ 3 ອົງການຈັດຕັ້ງມະຫາຊົນ, ສະມາຊິກພັກ ແລະ ພະນັກງານ-ລັດຖະກອນກະຊວງພາຍໃນ ຈົ່ງເພີ່ມທະວີຄວາມຮັບຜິດຊອບ, ຄວາມຫ້າວຫັນ, ມີຄວາມສາມັກຄີເປັນປຶກແຜ່ນ, ມີຄວາມເປັນເອກະພາບສູງ ເປັນເຈົ້າການຊີ້ນຳ-ນຳພາ ແລະ ເຂົ້າຮ່ວມປະກອບສ່ວນໃນຂະບວນການຕ່າງໆ ເພື່ອສ້າງຜົນງານຕ້ອນຮັບກອງປະຊຸມໃຫ່ຍຄັ້ງທີ II ຂອງ ອົງຄະນະພັກກະຊວງ, ກອງປະຊຸມໃຫ່ຍບັນດາໜ່ວຍພັກຮາກຖານ, ແລະ ກອງປະຊຸມໃຫ່ຍຂອງ  3 ອົງການຈັດຕັ້ງມະຫາຊົນ ກະຊວງພາຍໃນ ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຜົນສຳເລັດຢ່າງຈົບງາມ.

          ຫລັງຈາກພິທີສິ້ນສຸດ ກໍ່ໄດ້ມີຂະບວນການອອກແຮງງານລວມຂອງ ພະນັກງານ-ລັດຖະກອນ ກະຊວງພາຍໃນອ້ອມຂ້າງຕຶກກະຊວງພາຍໃນ ອີກດ້ວຍ.

Leave a Reply

Your email address will not be published. Required fields are marked *