ກະຊວງພາຍໃນ

Ministry of Home Affairs

ຄະນະຈາກກະຊວງພາຍໃນ ລົງຊຸກຍູ້ວຽກງານຂອງຂະແໜງພາຍໃນ ຢູ່ ແຂວງຜົ້ງສາລີ

1 min read

ໃນໂອກາດລົງຊຸກຍູ້ ແລະ ຕິດຕາມ ການຈັດຕັ້ງປະຕິບັດວຽກງານເປັນເສນາທິການ ແລະ ບໍລິຫານຮັບໃຊ້ການນໍາຂະແໜງພາຍໃນ ໃຫ້ມີປະສິດທິພາບ ແລະ ສະໜອງຄວາມຮຽກຮ້ອງຕ້ອງການຂອງສັງຄົມໄດ້ຢ່າງທົ່ວເຖິງ ຢູ່ເມືອງໃໝ່ ແຂວງຜົ້ງສາລີ ທ່ານ ນິມມະວົງ ອິນທະວົງ ຮອງຫົວໜ້າຫ້ອງການ ກະຊວງພາຍໃນ ພ້ອມດ້ວຍຄະນະ ໃນວັນທີ 09 ຕຸລາ 2019 ໂດຍໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານ ຂອງ ຫ້ອງການພາຍໃນເມືອງໃໝ່ ໃນໄລຍະຜ່ານ ຈາກທ່ານ ຄໍາໄມ ວົງວິຈິດ ຫົວໜ້າຫ້ອງການພາຍໃນເມືອງ ເມືອງໃຫມ່,  ໂດຍມີທ່ານ ສອນສະນຸກ ສີສຸລາດ ຮອງເຈົ້າເມືອງໆໃຫມ່ ແລະ ທ່ານ ສົມຈິດ ຫົງວິໄລຈິດ ຮອງຫົວໜ້າພະແນກພາຍໃນແຂວງ ແຂວງຜົ້ງສາລີ ພ້ອມດ້ວຍ ພະນັກງານ-ລັດຖະກອນ ຂອງຫ້ອງການພາຍໃນເມືອງ ເມືອງໃໝ່ ເຂົ້າຮ່ວມ.

          ທ່ານ ຄໍາໄມ ວົງວິຈິດ ຫົວໜ້າຫ້ອງການພາຍໃນເມືອງ ເມືອງໃຫມ່ ໂດຍໄດ້ຍົກໃຫ້ເຫັນ ການຈັດຕັ້ງປະຕິບັດວຽກງານ ຫ້ອງການພາຍໃນເມືອງ ເມືອງໃຫມ່ ແຂວງຜົ້ງສາລີ  ໃນໄລຍະຜ່ານມາ ສາມາດຍາດໄດ້ຜົນສໍາເລັດຫລາຍດ້ານ ເປັນຕົ້ນແມ່ນວຽກງານຄຸ້ມຄອງພົນລະເມືອງ, ຊົນເຜົ່າ-ສາສະຫນາ, ວຽກງານບໍລິຫານການປົກຄອງ ໂດຍສະເພາະຂັ້ນບ້ານ ແລະ ວຽກງານຄຸ້ມຄອງລັດຖະກອນ ແຕ່ຄຽງຄູ່ກັບຜົນເລັດດັ່ງກ່າວ ກໍ່ຍັງມີ ຂໍ້ຫຍຸ້ງຍາກ ເຊັ່ນການແບ່ງຄວາມຮັບຜິດຊອບ, ຂາດການຝຶກອົບຮົມຍົກລະດັບຄວາມຮູ້ຄວາມສາມາດໃຫ້ພະນັກງານ ແລະ ຂາດເຂີນອຸປະກອນຮັບໃຊ້ເຂົ້າໃນວຽກງານ. ຫລັງຈາກນັ້ນ ທ່ານ ນິມມະວົງ ອິນທະວົງ ຮອງຫົວໜ້າຫ້ອງການ ກໍ່ໄດ້ກ່າວຍ້ອງຍໍຊົມເຊີຍຕໍ່ຜົນງານຜົນສໍາເລັດດ້ານຕ່າງໆ ທີ່ຫ້ອງການພາຍໃນເມືອງຍາດມາໄດ້ໃນການເຄື່ອນໄຫວຈັດຕັ້ງປະຕິບັດວຽກງານ ແລະ ໃຫ້ຫ້ອງການພາຍໃນເມືອງສືບຕໍ່ຮັກສາມູນເຊື້ອ ກໍ່ຄື ຜົນງານທີ່ຍາດມາໄດ້ນັ້ນ ພ້ອມທັງປັບປຸງວຽກງານທີ່ຍັງຄົງຄ້າງໃຫ້ມີຜົນສໍາເລັດໃນຕໍ່ໜ້າ. ພ້ອມດຽວກັນນີ້ ຍັງໄດ້ຕາງໜ້າໃຫ້ຄະນະພັກ-ຄະນະນໍາ ກະຊວງພາຍໃນ ມອບພາຫະນະລົດຈັກ 01 ຄັນ ແລະ ຄອມພິວເຕີ 01 ຊຸດພ້ອມດ້ວຍເຄື່ອງພິມເອກະສານ 01 ເຄື່ອງ ລວມມູນຄ່າທັງໝົດ 16,700,000 ກີບ ໃຫ້ແກ່ຫ້ອງການພາຍໃນເມືອງໃຫມ່ ເພື່ອອຳນວຍຄວາມສະດວກໃຫ້ແກ່ການເຄື່ອນໄຫວວຽກງານອີກດ້ວຍ.

Leave a Reply

Your email address will not be published. Required fields are marked *