ກະຊວງພາຍໃນ

Ministry of Home Affairs

ກະຊວງພາຍໃນ ປິດບັ້ນຝຶກອົບຮົມວຽກງານຈັດຕັ້ງ, ກໍ່ສ້າງພັກ-ພະນັກງານ

1 min read

ໃນຕອນເຊົ້າຂອງວັນທີ26  ສິງຫາ 2019 ກະຊວງພາຍໃນ ໄດ້ຈັດພິທີປິດບັ້ນຝຶກອົບຮົມວຽກງານຈັດຕັ້ງ, ກໍ່ສ້າງພັກ-ພະນັກງານ ໃຫ້ແກ່ ພະນັກງານຫຼັກແຫຼ່ງ ຂອງ ກະຊວງພາຍໃນ ໂດຍການເປັນປະທານຂອງ ທ່ານ ສີພຸກ ວົງພັກດີ ຄະນະພັກກະຊວງ ຮອງລັດຖະມົນຕີ ກະຊວງພາຍໃນ, ຄະນະກົມ, ຫົວໜ້າພະແນກ, ຮອງຫົວໜ້າພະແນກ ທີ່ສັງກັດຫ້ອງການ, ບັນດາກົມ, ສະຖາບັນ ແລະ ສູນ ພ້ອມດ້ວຍພະນັກງານທີ່ຮັບຜິດຊອບວຽກງານຈັດຕັ້ງ ເຂົ້າຮ່ວມ ເຊິ່ງການຝຶກອົບຮົມຄັ້ງນີ້ ໄດ້ດຳເນີນເປັນໄລຍະເວລາ 10 ວັນ.

          ການຈັດຝຶກອົບຮົມໃນຄັ້ງນີ້, ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບ ພື້ນຖານແນວທາງນະໂຍບາຍຂອງພັກ ແລະ ນິຕິກໍາຕ່າງໆທີ່ພັກກໍານົດອອກໃນແຕ່ລະໄລຍະ ບັນດາບົດຮຽນທີ່ພົວພັນກັບວິຊາວຽກພັກ ແລະ ວິຊາວຽກພະນັກງານ ລວມມີ 02 ພາກ ແລະ 15 ບົດຄື: ພາກວິຊາວຽກພັກປະກອບມີ 08 ບົດຄື ວິທີຈັດຕັ້ງປະຕິບັດແນວທາງນະໂຍບາຍຂອງພັກ, ຍົກສູງຄຸນນະພາບການຈັດຕັ້ງຮາກຖານພັກໃຫ້ປອດໃສ ເຂັ້ມແຂງ ໜັກແໜ້ນ, ການຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກໃນໄລຍະໃໝ່, ການຕີລາຄາຄຸນນະພາບ ແບ່ງປະເພດສະມາຊິກພັກ ແລະ ໜ່ວຍພັກ, ເພີ່ມທະວີວຽກງານຄຸ້ມຄອງ ແລະ ລະບຽບການຍົກຍ້າຍຮ່ວມສະມາຊິກພັກ, ການກະກຽມຈັດກອງປະຊຸມໃຫຍ່ 3 ຂັ້ນຂອງພັກ, ເນື້ອໃນພື້ນຖານກ່ຽວກັບວຽກງານປ້ອງກັນພັກ-ພະນັກງານ, ສ່ວນພາກວິຊາວຽກງານພະນັກງານ ປະກອບມີ 07 ບົດ ຄື ການສັບປ່ຽນໜ້າທີ່ ແລະ ບ່ອນປະຈໍາການຂອງພະນັກງານ, ວຽກງານຕີລາຄາ ແລະ ນໍາໃຊ້ພະນັກງານ, ວຽກງານຄຸ້ມຄອງພະນັກງານ,ວຽກງານຂຶ້ນແຜນກໍານົດພະນັກງານ, ການສ້າງມາດຖານພະນັກງານ, ການບໍາລຸງ-ກໍ່ສ້າງພະນັກງານນໍາພາ-ຄຸ້ມຄອງ ແລະ ການປະຕິບັດນະໂຍບາຍຕໍ່ພະນັກງານ-ລັດຖະກອນ ຢູ່ ສປປ ລາວ.           ພິທີປິດບັ້ນຝຶກອົບຮົມດັ່ງກ່າວ ທ່ານ ສີພຸກ ວົງພັກດີ ຄະນະພັກກະຊວງ ຮອງລັດຖະມົນຕີ ກະຊວງພາຍໃນ ໄດ້ໃຫ້ກຽດມອບໃບຢັ້ງຢຶນໃຫ້ແກ່ນັກຝຶກອົບຮົມ ພ້ອມທັງ ທ່ານໄດ້ໂອ້ລົມ ແລະ ເນັ້ນໜັກໃຫ້ ຜູ້ເຂົ້າຮ່ວມບັ້ນຝຶກອົບຮົມ ສືບຕໍ່ນຳເອົາບົດຮຽນດັ່ງກ່າວ ໄປຄົ້ນຄວ້າຢ່າງລະອຽດ ເພື່ອກຳແໜ້ນແຕ່ລະເນື້ອໃນຢ່າງເລິກເຊິ່ງ, ເພື່ອນຳໄປຜັນຂະຫຍາຍໃນການຈັດຕັ້ງປະຕິບັດໜ້າທີ່ວຽກງານຂອງຕົນຢ່າງປະດິດສ້າງ, ສືບຕໍ່ຄົ້ນຄວ້າຮໍ່າຮຽນຍົກລະດັບຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຈິດໃຈປະຕິວັດຢືດອຸດົມການຂອງພັກ, ອຸດົມການສັງຄົມນິຍົມ, ເຊີດຊູຄວາມເປັນແບບຢ່າງໃນທຸກໆດ້ານ ເພື່ອຝຶກຝົນຫຼຸໍ່ຫຼອມຕົນເອງໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງ, ເປັນແບບຢ່າງໃນການເຄື່ອນໄຫວການດຳລົງຊີວິດທີ່ປອດໃສ, ດຸໝັ່ນ, ປະຫຍັດ, ອົດທົນ, ຊື່ສັດ ແລະ ທ່ຽງທຳ, ບໍ່ສວຍໃຊ້ຕໍ່າແໜ່ງ ເພື່ອສະແຫວງຫາຜົນປະໂຫຍດສ່ວນຕົວ ຈະເປັນທາງກົງ ແລະ ທາງອ້ອມ, ມີຄວາມຕັ້ງໜ້າບໍລິສຸດຕໍ່ປະເທດຊາດ, ຕໍ່ພັກ, ຕໍ່ລະບອບໃໝ່, ກະຕັນຍູຮູ້ບຸນຄຸນຕໍ່ປະຊາຊົນ ແລະ ຝຶກຝົນຫຼໍ່ຫຼອມຕົນເອງໃຫ້ມີຄວາມກ້າວໜ້າຍົກລະດັບຄວາມຮູ້ຄວາມສາມາດ ທັງດ້ານທິດສະດີ ແລະ ວິຊາສະເພາະຂອງຕົນຢ່າງບໍ່ຢຸດຢັ້ງ.

Leave a Reply

Your email address will not be published. Required fields are marked *