ກະຊວງພາຍໃນ

Ministry of Home Affairs

ລມຕ ກະຊວງພາຍໃນ ເຄື່ອນໄຫວວຽກງານຢູ່ແຂວງສາລະວັນ

7 min read

ວັນທີ 8 ສິງຫາ 2019 ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ເຄື່ອນໄຫວ ຊຸກຍູ້ການຈັດຕັ້ງປະຕິບັດວຽກງານຂະແໜງພາຍໃນ ຢູ່ແຂວງສາລະວັນ. ໃນໂອກາດເຄື່ອນໄຫວວຽກງານເທື່ອນີ້ ໄດ້ຮັບຟັງການລາຍງານສະພາບການເຄື່ອນໄຫວຈັດຕັ້ງປະຕິບັດວຽກງານ ໃນໄລຍະຜ່ານມາ ແລະ ແຜນການເຄື່ອນໄຫວວຽກງານ ຂະແໜງພາຍໃນ ໃນຕໍ່ໜ້າ ຈາກ ທ່ານ ແສງອາລຸນ ບຸນພະສີ ຫົວໜ້າພະແນກພາຍໃນແຂວງສາລະວັນ ໂດຍໄດ້ຍົກໃຫ້ບັນຫາທີ່ພົ້ນເດັ່ນ ແລະ ບັນຫາຄົງຄ້າງ ທີ່ຄະນະພະແນກພາຍໃນແຂວງ, ບັນດາຄະນະຫ້ອງການພາຍໃນເມືອງ ແລະ ພະນັກງານ-ວິຊາການ ຈະຕ້ອງໄດ້ພ້ອມກັນສືບຕໍ່ເອົາໃຈໃສ່ແກ້ໄຂໃຫ້ສໍາເລັດ ເປັນຕົ້ນແມ່ນ ວຽກງານລັດຖະກອນ, ວຽກງານພົນລະ ເມືອງ ແລະ ວຽກງານເຂດແດນເຊື່ອມຕໍ່ ລະຫວ່າງ ແຂວງກັບແຂວງ, ເມືອງກັບເມືອງ ແລະ ລະຫວ່າງບ້ານຕໍ່ບ້ານ ໂດຍສະເພາະພື້ນທີ່ເຮັດການຜະລິດທີ່ຕິດພັນກັບການແກ້ໄຂຊີວິດການເປັນຢູ່ຂອງປະຊາ ຊົນບັນດາເຜົ່າ.

ຈາກນັ້ນ ຕາງໜ້າຫ້ອງການ ແລະ ບັນດາກົມຂອງກະຊວງພາຍໃນ ໄດ້ປະກອບຄໍາຄິດຄໍາເຫັນ ເພື່ອຖອດຖອນ ແລະ ແລກປ່ຽນບົດຮຽນ ກໍ່ຄື ຫາແນວທາງພັດທະນາ ປັບປຸງ ແກ້ໄຂວຽກງານໃຫ້ມີຜົນສໍາເລັດທີ່ຍິ່ງໃຫຍ່ໃນຕໍ່ໜ້າຮ່ວມກັບພະແນກພາຍໃນແຂວງສາລະວັນ ກ່ຽວກັບບັນຫາວຽກງານຕ່າງໆຂອງຂະແໜງພາຍໃນ ເຊັ່ນ: ບັນຫາທີ່ຕິດພັນກັບຂົງເຂດວຽກງານແຜນທີ່-ເຂດແດນເຊື່ອມຕໍ່, ວຽກງານຂົງເຂດລັດຖະກອນ, ລະບົບຄຸ້ມຄອງລັດຖະກອນແບບເອເລັກໂຕຣນິກ, ການບັນຈຸຊັບຊ້ອນພະນັກງານແຕ່ລະຂັ້ນ, ການປະເມີນຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ, ວຽກງານຈັດຕັ້ງ-ການຊັບຊອນໂຍກຍ້າຍ ແລະ ການແຕ່ງຕັ້ງ ພະນັກງານ ໄປຮັບໜ້າທີ່ໃໝ່ ແລະ ວຽກງານໂຄສະນາ-ເຜີຍແຜ່ຜົນງານ-ການເຄືອນໄຫວວຽກງານຕ່າງໆຂອງຂະແໜງພາຍໃນ ເພື່ອໃຫ້ສັງຄົມໄດ້ຮັບຮູ້ຢ່າງກວ້າງຂວາງ ຜ່ານພາຫະນະສື່ມວນຊົນແຕ່ລະປະເພດໃຫ້ນັບມື້ນັບເພີ່ມຂຶ້ນ ເຊັ່ນ: ວິທະຍຸ, ໂທລະພາບ ແລະ ໜັງສືພິມສະບັບຕ່າງໆ. ນອກນັ້ນຍັງໂຄສະນາຜ່ານ ວາລະສານ, ເວບໄຊ ແລະ ແອັບຟີເຄຊັນຕ່າງໆຂອງຂະແໜງພາຍໃນ ທີ່ພວມພັດທະນາໃຫ້ເປັນເຄື່ອງມືຮັບໃຊ້ວຽກງານໂຄສະນາຂອງຂະແໜງພາຍໃນ ເພື່ອໃຫ້ສັງຄົມສາມາດເຂົ້າເຖິງແຫຼ່ງຂໍ້ມູນໄດ້ໂດຍກົງ. ພ້ອມດຽວກັນ ລັດຖະມົນຕີກະຊວງພາຍໃນ ໄດ້ໃຫ້ທິດຊີ້ນໍາ ໂດຍເນັ້ນໃຫ້ ພະແນກພາຍໃນແຂວງ ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນ ກໍາໄດ້ແນວທາງນະໂຍບາຍຂອງພັກ-ລັດ, ນໍາເອົາບັນດານິຕິກໍາຕ່າງໆທີ່ຕິດພັນກັບວຽກງານຂະແໜງພາຍໃນ ມາຜັນຂະຫຍາຍເພື່ອເປັນບ່ອນອີງໃນເຄື່ອນໄຫວຈັດຕັ້ງປະຕິບັດວຽກງານ, ສືບຕໍ່ເອົາໃຈໃສ່ວຽກງານປັບປຸງກົງຈັກ, ວຽກງານສາມສ້າງ ແລະ ວຽກງານຍ້ອງຍໍ-ແຂ່ງຂັນຮັກຊາດພັດທະນາ ໃຫ້ມີຄວາມໜັກແໜ້ນໃນການຈັດຕັ້ງປະຕິບັດ.

Leave a Reply

Your email address will not be published. Required fields are marked *