ກະຊວງພາຍໃນ

Ministry of Home Affairs

ລາວ-ກໍາປູເຈຍ ສືບຕໍ່ຮ່ວມມືວຽກງານສາສະໜາ

6 min read

ເພື່ອເປັນການຮັດແໜ້ນຄວາມສາມັກຄີ, ສາຍພົວພັນມິດຕະພາບ ແລະ ການຮ່ວມມືພິເສດ ລະຫວ່າງສອງຊາດ ລາວ-ກໍາປູເຈຍ ໂດຍສະເພາະ ກະຊວງພາຍໃນ ແຫ່ງ ສປປ ລາວ ແລະ ກະຊວງທໍາມະການ ແລະ ສາສະໜາ ແຫ່ງຣາຊະອານາຈັກກໍາປູເຈຍ ໃຫ້ນັບມື້ມີການພັດທະນາ ແລະ ຂະຫຍາຍຕົວຂຶ້ນເລື້ອຍໆ. ລະຫວ່າງວັນທີ 26-29 ມິຖຸນາ 2019 ທ່ານ ຮັກ ບຸນເທື່ອນ (H.E Mr. Hak BUNTHEOUN) ຮອງລັດຖະມົນຕີກະຊວງທໍາມະການ ແລະ ສາສະໜາ ແຫ່ງຣາຊະອານາຈັກກໍາປູເຈຍ ພ້ອມດ້ວຍຄະນະ ກໍໄດ້ເດີນທາງມາຢ້ຽມຢາມ ແລະ ຮ່ວມເຮັດວຽກຮ່ວມກັບ ກະຊວງພາຍໃນ ແຫ່ງ ສປປ ລາວ ທີ່ນະຄອນຫຼວງວຽງຈັນ.

          ໃນໂອກາດເດີນທາງມາຢ້ຽມຢາມ ແລະ ຮ່ວມເຮັດວຽກ ຢູ່ ສປປ ລາວ ທ່ານ ຮັກ ບຸນເທື່ອນ ພ້ອມດ້ວຍຄະນະໄດ້ເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນກ່ຽວກັບວຽກງານສາສະໜາ ກັບກະຊວງພາຍໃນ ຂອງ ສປປ ລາວ ເຊິ່ງນໍາຄະນະໂດຍທ່ານ ປອ ທອງຈັນ ມະນີໄຊ ຮອງລັດຖະມົນຕີກະຊວງພາຍໃນ, ກອງປະຊຸມໄດ້ປຶກສາຫາລື ແລະ ທົບທວນຄືນກ່ຽວກັບວຽກງານສາສະໜາທີ່ໄດ້ຮ່ວມກັນຈັດຕັ້ງປະຕິບັດໃນໄລຍະຜ່ານມາ ເຊິ່ງທັງສອງຝ່າຍຍັງເຫັນດີທີ່ຈະສືບຕໍ່ຮ່ວມມືກັນດ້ານວຽກງານສາສະໜາ ເປັນຕົ້ນແມ່ນ: ສະໜັບສະໜູນການແລກປ່ຽນຄະນະຜູ້ແທນລະຫວ່າງການຈັດຕັ້ງທາງວິຊາການຂອງສອງລັດຖະບານທີ່ກ່ຽວຂ້ອງກັບວຽກງານສາສະໜາໃນລະດັບສູນກາງ ຫຼື ທ້ອງຖິ່ນ, ສືບຕໍ່ຈັດກອງປະຊຸມທະວິພາຄີໃນຫົວຂໍ້ທີ່ເຫັນວ່າມີຜົນປະໂຫຍດຮ່ວມກັນດ້ານວຽກງານສາສະໜາ, ສືບຕໍ່ຊ່ວຍເຫຼືອເຊິ່ງກັນ ແລະ ກັນທາງດ້ານວັດຖຸ, ອຸປະກອນ, ພະນັກງານ-ວິຊາການ ແລະ ການແລກປ່ຽນຂໍ້ມູນຂ່າວສານທາງດ້ານວຽກງານສາສະໜາ ແລະ ອື່ນໆ.

          ໃນໂອກາດທີ່ເດີນທາງມາຢ້ຽມຢາມ ຢູ່ ສປປ ລາວ ໃນຄັ້ງນີ້ ທ່ານ ຮັກ ບຸນເທື່ອນ ພ້ອມດ້ວຍຄະນະຍັງໄດ້ເຂົ້າຢ້ຽມຂໍ່ານັບບັນດາທ່ານການນໍາຂັ້ນສູງຂອງພັກ-ລັດ ແລະ ຂະແໜງການທີ່ກ່ຽວຂ້ອງຂອງລາວ ແລະ ຢ້ຽມຊົມພື້ນຖານເສດຖະກິດ, ສະຖານທີ່ສໍາຄັນທີ່ເປັນມູນເຊື້ອທາງປະຫວັດສາດ, ສາສະໜາ ແລະ ວັດທະນາທໍາ ທີ່ມີຄວາມໝາຍຄວາມສໍາຄັນຕໍ່ກັບປະຊາຊົນລາວຕື່ມອີກ.

Leave a Reply

Your email address will not be published. Required fields are marked *